Túrkistan oblysynda 250-den astam dáriger jetispeıdi

TÚRKІSTAN. KAZINFORM — Óńirdegi medıtsınalyq mekemeler tájirıbeli dárigerlerdi jumysqa qabyldaýǵa daıyn.

Búginde Túrkistan óńirinde 250-den astam beıindi dáriger jetispeýshiligi anyqtalyp otyr. Anestezıolog jáne reanımatologııa, akýsherlik-gınekologııa, nevrologııa, kardıologııa, neonatologııa, travmatologııa-ortopedııa, oftalmologııa, otorınolarıngologııa, klınıkalyq farmakolog, ınfektsıonıst, onkolog mamandary tapshy.

Oblys ákiminiń orynbasary Beısenbaı Tájibaevtyń aıtýynsha, aımaqtyń medıtsınalyq mekemeleri osy salalarda tájirıbesi bar kadrlardy jumysqa qabyldaýǵa daıyn. 

— Óńirde 24 myńnan astam medıtsına qyzmetkeri halyqqa eńbek etip keledi. Degenmen demografııalyq jaǵynan kósh bastap turǵan Túrkistan oblysy úshin bilikti dárigerler qajet. Osy máseleni sheshý maqsatynda oblys ákimdigi 5 jyldyq jospar bekitken bolatyn. 2023-2029 jyldary rezıdentýraǵa 675 grant bólinip, jergilikti bıýdjetten qarajat qarastyryldy. 2023-2024 oqý jylynda túsken 176 rezıdent Astana, Almaty, Qaraǵandy jáne Túrkistan qalalaryndaǵy medıtsına ýnıversıtetterinde bilimin jetildirip jatyr. Kadrlar daıyndalyp jatyr. Olarǵa bir ǵana shart qoıylǵan. Mindetti túrde Túrkistan oblysyna kelip, densaýlyq saqtaý uıymdarynda qyzmet kórsetýi tıis, — deıdi Beısenbaı Tájibaev.

Bıyl da oblys ákimdigi tarapynan rezıdentýraǵa 75 grant belgilenip, 145,4 mln teńge bólindi. Qazirgi tańda tapshy mamandyqtardyń tizimi ázirlendi. Densaýlyq saqtaý basqarmasy jáne elimizdegi jetekshi ýnıversıtetter arasynda granttardy bólý jumystary júrgizilip jatyr. Úmitkerlerdiń atalǵan konkýrsqa qatysýǵa múmkindigi bar.

Aıta keteıik, budan buryn óńirde 115 mektepti qamtıtyn renovatsııalyq joba iske asyp jatqanyn jazǵan bolatynbyz.