Túrkistan oblysynda 200 myńǵa jýyq zeınetker turady, onyń 11-i ekinshi dúnıejúzilik soǵys ardageri
TÚRKІSTAN. KAZINFORM — Búginde óńirde 195 myńnan astam zeınetker turady. Onyń ishinde 11-i ekinshi dúnıejúzilik soǵys ardageri bolsa, qalǵany ekinshi dúnıejúzilik soǵysqa qatysýshylar men múgedekterine teńestirilgender jáne tyl eńbekkerleri. Bul týraly Túrkistan oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy Asııa Temirbaeva málimdedi.
1 qazan — Qarttar kúni halyqaralyq deńgeıde atap ótiledi. Aıtýly merekege oraı oblystyq jáne jergilikti deńgeılerde kóptegen is-sharalar men aktsııalar ótkizildi.
«Urpaqtar sabaqtastyǵy — bul tek ýaqyt arasyndaǵy kópir ǵana emes, ult tarıhy, mádenıeti, dástúri men qundylyqtarynyń býynnan-býynǵa úzilmeı jalǵasýy. Árbir eresek adam ózinen keıingilerge aqyl-keńes, tálim-tárbıe berip, olardyń ómir jolyna baǵyt-baǵdar kórsetedi. Osy arqyly bolashaq urpaqtyń sanasyna adamgershilik, adaldyq, eńbekqorlyq sııaqty qasıetter sińiriledi. Qarttarymyzdyń ómirlik tájirıbesi men jastardyń energııasy jáne ınnovatsııalyq oılary birikkende, qoǵam jańa bıikterdi baǵyndyrady. Bul sabaqtastyq tek otbasylyq deńgeıde emes, jalpyulttyq deńgeıde de mańyzdy. Tamyryn tereńge jaıǵan aǵashtyń butaǵy berik bolatyny sııaqty, óz tarıhy men ádet-ǵurpyn saqtaǵan memlekettiń bolashaǵy jarqyn bolady. Eldi birlikke, turaqtylyqqa, izgi bastamalarǵa da shaqyratyn osy — qarttarymyz. Qarııalardyń ómirlik joly men aqyl-keńesteri ár ýaqytta jas urpaq úshin baǵa jetpes baılyq, temirqazyq ispettes. Ómirde kórgeni kóp, túıgeni mol qarttarymyzdyń aqyl-oıy — halqymyzdyń rýhanı baılyǵy. Sondyqtan olarǵa qurmet pen jylýlyqty aıamaý qajet» - dedi Túrkistan oblysynyń jumyspen qamtýdy úılestirý jáne áleýmettik baǵdarlamalar basqarmasynyń basshysy Asııa Temirbaeva.
Búginde «Qamqorlyq» aktsııasy sheńberinde zeınetkerlerge qoǵamdyq kólikterde tegin júrýge jáne kommýnaldyq qyzmetterdi tóleýde jeńildikter qarastyrylyp keledi. Bıyldyń ózinde aktsııa aıasynda 10 myńǵa jýyq azamatyń jekelegen sanattary men ardagerlerge kómek kórsetildi.
Jyl saıyn oblystyq bıýdjet esebinen «Ardagerler úıi» men «Meıir» ardagerler úılerinde 8 myńǵa jýyq zeınetker densaýlyǵyn túzeýge, tynyǵýǵa múmkindik alyp otyr. 1537 aǵa urpaq ókili tegin basylymdarǵa jazylǵan. Jasy 80-nen asqan 320-ǵa jýyq jalǵyzilikti qarııanyń zeınetaqysyna bir AEK mólsherinde ústemaqy tólenedi. Sondaı-aq shıpajaılarda em qabyldaýǵa joldama beriledi. Aýdan, qalalyq jumyspen qamtý jáne áleýmettik baǵdarlamalar bólimderi janyndaǵy 22 úıde áleýmettik kómek kórsetý bólimsheleri arqyly 2 198 jalǵyzilikti qarııa kúndizgi ýaqytta úıde qyzmetter kórsetý jaǵdaıyndaǵy qyzmettermen qamtylýda. Sonymen qatar óńir kóleminde jalpy sany 19 «Belsendi uzaq ómir súrý ortalyǵy» qarttarǵa áleýmettik-medıtsınalyq, áleýmettik-psıhologııalyq, áleýmettik-quqyqtyq sekildi 7 baǵyt boıynsha kómek beredi.
«Memlekettik qoldaýlar munymen shektelmeıdi. Qosymsha demeýshilerdi de tarta otyra, túrli baǵyttaǵy is-sharalar men kómekterdi uıymdastyryp kelemiz. Merekelerde ózim, mende múmkindik bolmaǵan jaǵdaıda ujymymyz qarttarymyz ben qyzmet alýshylardyń ahýalyn baqylap turamyz. Óıtkeni qarııalarymyzǵa eń áýeli jyly sóz kerek. Ata-áje tárbıesin kórgen biz úshin olarmen betpe-bet tildesý — ǵumyrlyq tálimmen teń. Danalyqtyń kózi sanalatyn ardagerlerimizdi qashanda qadirleıik. Merekemen shyn júrekten quttyqtaımyn! Zor densaýlyq, amandyq, uzaq ǵumyr, shańyraqtaryńyzǵa baq-bereke tileımin. Ár kún tek qýanysh pen baqytqa toly bolsyn!» - dedi Asııa Temirbaeva.
Búgin Túrkistan oblysyna qarasty barlyq aýdan, qalalarda halyqaralyq qarttar kúni keń kólemde atalyp ótti. Atap aıtar bolsaq, Arys qalalyq mádenıet úıinde 1 qazan — Halyqaralyq qarttar kúnine oraı merekelik shara ótti. Onda ardagerler keńesi músheleri men ár salada eńbek etken sala mamandary arnaıy shaqyrylyp, erekshe qurmet kórsetildi.
Qala ákimi Gúljan Qurmanbekova ardaqty ardagerlerdi aıtýly kúnmen quttyqtap, jalpyqalalyq mádenı sharalarǵa belsendi qatysyp, salamatty ómir saltyn ustanǵan jáne qalanyń damýyna ózindiń úles qosqan qarııalardy arnaıy medalmen jáne Alǵys hatpen marapattady. Sonymen qatar 300-ge jýyq ardagerge merekelik syılyqtar tabys etti.
Saıram aýdanynyń ákimi Arman Sábıtov jasy 100-den asqan Aqbulaq aýylynyń turǵyny Qyzylkúl Qýandyqovany tól merekesimen quttyqtap, shańyraǵyna arnaıy bardy.
«Sizdiń árbir júrip ótken ómir jolyńyz óskeleń urpaq úshin óshpes ónege. Mine, búginde eńbegińizdiń zeınetin kórip otyrǵan shaqta da urpaqtaryńyzǵa izgi isterdiń jarqyn úlgisin kórsetip kelesiz. Qashanda shańyraǵyńyzdyń uıytqysy bolyp, shattyqtyń sáýlesin sebe berińiz. Otbasyńyzǵa bereke, birlik tileımin!» — dedi aýdan basshysy Arman Sábıtov.
Ǵasyr kýási atanǵan Qyzylkúl Qýandyqovaǵa aýdan ákimi óziniń atynan arnaıy quttyqtaý hat pen syılyqtaryn tabystap, ıyǵyna aq jaýlyq japty. Óz kezeginde, júz jasaǵan ana búgingi jas býynnyń ózine kórsetip jatqan syı-qurmetine analyq aqjarma tilegin arnady. Aýdandy alǵa damytý jolyndaǵy jańa bastamalaryna sáttilik tilep, aq batasyn berdi.
Al, Shardara aýdanynda 100 qarııaǵa aýdan ákimi Arman Qarsybaevtyń atynan alǵys hattar men estelik syılyq tartý etildi.
Qarttar kúnine arnalǵan is-sharalar oblystyń barsha aýdan, qalalarynda jalǵasyn tapty.
