Túrkistan oblysy bıyl sýarmaly sýdan tapshylyq kórýi múmkin

TÚRKІSTAN. KAZINFORM — Óńirdegi sý qoımalarynda sýdyń kólemi ótken jylmen salystarǵanda az jınalǵan. Bul týraly Túrkistan oblysy ákiminiń orynbasary Ermek Kenjehanuly sala mamandarymen ótken selektorlyq keńeste aıtty.

Túrkistan oblysynda kóktemgi dala jumystaryna daıyndyq bastaldy.

Jalpy bıylǵy kóktemgi egis jumystary 873,6 myń gektar jerde júrgiziledi dep josparlanyp otyr. Bul ótken jylmen salystyrǵanda 3,4 myń gektarǵa artyq.

Dándi daqyl 335 myń gektar jerge egilse, burshaqty daqyl — 3,8 myń gektarǵa, maıly daqyl — 76,9 myń gektarǵa, tehnıkalyq daqyl — 105,3 myń gektar, al kókónis 44,9 myń gektarǵa egilmek.

Bir aıta keterligi, bıyl sharýalarǵa beriletin memlekettik qoldaý kólemi artty.

«Mıneraldy tyńaıtqyshqa 7 mlrd teńge bólindi. Basym daqyldardyń óndirisin damytýdy sýbsıdııalaý baǵdarlamasyna respýblıkalyq bıýdjetten qosymsha 5 mlrd teńge bólý usynyldy. Tuqym sharýashylyǵyn qoldaý baǵdarlamasyna 600 mln teńge oblystyq bıýdjetten qaraldy. Aǵyn sý jetkizý qunyn sýbsıdııalaýǵa 150 mln teńge qarjy bólindi. Sonymen qatar, bıyl 22 myń tonnaǵa jýyq janarmaıǵa ótinim tapsyrylǵan. Kóktemgi dala jumystaryna 2024 jyly 13,4 mlrd teńge kóleminde nesıe qarjysy josparlandy. Búgingi kúnge 2,2 mlrd teńgege taýar óndirýshiler qarjylandyryldy», -dedi Ermek Kenjehanuly.

Sala mamandarynyń baıandaýynsha, kóktemgi dala jumystaryna tehnıka 95 paıyzǵa daıyn.

Bıyl 1382 kombaın, traktor jáne qosymsha qural-jabdyq satyp alynǵan. Oblysta 24 myńǵa jýyq aýyl sharýashylyǵy tehnıkasy bar.

Degenmen, bıyl da sý máselesi ózekti bolaıyn dep tur.

Sebebi, sý qoımasynda sýdyń kólemi ótken jylmen salystyrǵanda az jınalǵan.

«Biz qazirden árbir sharýaǵa túsindirý jumystaryn júrgizip, sýdy kóp qajet etpeıtin ónim túrlerimen aınalysýǵa shaqyrýymyz qajet. Egis alqaptaryn ártaraptandyrý óz aldyna, ózekti máseleniń taǵy biri — kóktemgi egis jumystaryna jumsalatyn jeńildetilgen janar-jaǵarmaı»-dedi ol.