Túrkistan oblysy Aýstralııa tájirıbesimen et klasterin damytady

TÚRKІSTAN. KAZINFORM – Túrkistan oblysynda zamanaýı mal bırjasy, bordaqylaý kesheni, et ónimderin tereń jáne qaıta óńdeý baǵytynda 5 jańa joba júzege asady. Bul týraly oblys ákimi Darhan Satybaldy aıtyp berdi.

Spıkerdiń aıtýynsha, Túrkistan oblysy et eksporty boıynsha elimizde kóshbasshy sanalady. 

«Eksporttaǵy iri qara mal etiniń 80%, qoı etiniń 75% bizdiń óńirge tıesili. Aýstralııa eliniń tájirıbesinde et klasterin damytýdy josparlap otyrmyz. Zamanaýı mal bırjasy, bordaqylaý kesheni, et ónimderin tereń jáne qaıta óńdeý baǵytynda 5 jobany júzege asyrý kózdelýde», — dedi D. Satybaldy Ortalyq kommýnıkatsııalar qyzmetinde.

Bul baǵytta 55 mlrd teńge ınvestıtsııa salynyp, 600 jumys orny quryldy jáne 35 myń tonna ónim shyǵarylatyn bolady.

Sonymen birge, sút óndirisin ulǵaıtý, óńdeý kásiporyndarynyń qýattylyǵyn arttyrý boıynsha 7,8 mlrd teńgege 2 iri taýarly sút fermasy iske qosyldy.

Aıta keteıik, Túrkistanda shetelge jumys kúshterin daıyndaıtyn Arnaıy ortalyq ashyldy. Bul ortalyq Ulybrıtanııa jáne Ońtústik Koreıada jumys istegisi keletin azamattardy oqytyp, daıyndaıdy.

Túrkistan qalasynda 147 mlrd teńgege maqtany tereń óńdeıtin iri zaýyttyń qurylysy bastaldy. Zaýytta 4 myńnan astam jumys orny ashylyp, jylyna 13 myń tonna ıirilgen jip, 50 mıllıon metr úı toqyma buıymdary, 7 mıllıon dana tósek-oryn shyǵarady.

Sondaı-aq, oblystaǵy ındýstrııalyq aımaqtarǵa qolaıly jaǵdaı jasaý maqsatynda ındýstrııalyq aımaqtarda elektr energııasy tarıfi 47 teńgeden 25 teńgege deıin arzandatyldy.