Túrkistan «Halyqaralyq qolónershiler qalasy» mártebesin alýǵa nıetti
TÚRKІSTAN. KAZINFORM- Túrkistan qalasyna qolónerdi biriktirýshi – «World Craft Council» halyqaralyq uıymynyń sarapshylary keldi.

Dúnıejúzilik qolóner keńesiniń Azııa-Tynyq muhıty aımaǵy boıynsha vıtse-prezıdenti Aıdarhan Kalıev pen sarapshylary Úndistandyq Sohan Kýmar Dja, Túrkııadan Mahootchıan ıAlda, dúnıejúzilik qolóner keńesiniń Ońtústik-Shyǵys Azııa aımaǵy boıynsha vıtse-prezıdenti jáne sarapshysy Le Ba Ngok qala ákimimen kezdesip, qaladaǵy qolóner salasynyń damýymen tanysty. Sonymen qatar «qolónershiler qalasy» mártebesine ıe bolýy úshin atqarylatyn jumys baǵyttary men saladaǵy yntymaqtastyq jaıy talqylandy.
Ótken jyly Dúnıejúzilik qolóner keńesi uıymynyń 31 múshesi Túrkistan qalasyna arnaıy kelip, jergilikti qolónershilerdiń jumysyna joǵary baǵa bergen bolatyn. Osyǵan oraı, Túrkistan qalasy atalǵan uıymǵa múshe bolýǵa ótinim bergen.
Basqosýda dúnıejúzilik qolóner keńesiniń Azııa-Tynyq muhıty aımaǵy boıynsha vıtse-prezıdenti Aıdarhan Kalıev Túrkistanmen yntymaqtastyqty damytýǵa daıyn ekenin jetkizdi. Túrkistannyń «Halyqaralyq qolónershiler qalasy» mártebesin alý ortaq maqsat ekenin jetkizip, osy jolda birlesip jumys isteýge nıetin bildirdi.
Al, qala ákimi Ázimbek Pazylbekuly «Halyqaralyq qolónershiler qalasy» mártebesin alýdyń mańyzyna toqtaldy.
– Uly Jibek jolynyń mańyzdy ortalyqtarynyń biri bolyp, ejelden qolónerdiń damýyna úlken úles qosqan Túrkistan búginde «Halyqaralyq qolónershiler qalasy» mártebesin alýǵa nıetti. Búginde qalamyzdyń qolóner salasy óziniń tereń tamyry men ulttyq erekshelikterin saqtaı otyryp, zamanaýı úrdistermen úılesimdi damyp keledi. Túrkistandyq sheberler jasaǵan keramıkalyq buıymdar ózderiniń ásemdigimen, naqyshty órnekterimen jáne sapasymen erekshelenedi. Aldaǵy ýaqytta qolnershilerdi qoldaýǵa baqyttalǵan úlken jobalarymyz bar, – dedi qala basshysy.
Komıssııa qorytyndysy aldaǵy sáýir aıynda shyqpaq. Eger oń sheshim qabyldansa, Túrkistan-Halyqaralyq qolónershiler qalasy atanady.
Aıta keteıik, budan buryn Túrkistandyqtar qaı salanyń qyzmetine jıi shaǵymdanatyndyǵyn jazǵan bolatynbyz.