«Túrkistan Arenaǵa» bıýdjet esebinen jylý tartylady
«Túrkistan Arena» stadıonynyń kógalyna bıýdjet esebinen jylý tartylady. Bul týraly Túrkistan oblysynyń ákimi Darhan Satybaldy Ortalyq kommýnıkatsııalar qyzmetinde aıtty, dep habarlaıdy Kazinform.
«Stadıonnyń qurylysy «Samuryq-Qazyna» arqyly júrgizilip, iske qosylǵan. Ol jerde «Turan» fýtbol klýby ornalastyrylǵan. Ózderińiz bilesizder, buqaralyq aqparat quraldaryna shyqty – fýtbol oınap jatqanda jańbyr sýy jergen sińbegen, sondaı bir problemalar bolǵan. Ol jerde túrli is-shara jasalsa da, eshqaısysy kómektesken joq. Aqyry betine tóselgen búkil gazondy, shymyn alyp, astyna tastalǵan qabattardy qaıtadan jasap jatyrmyz. Onyń bári 100 paıyz merdigerdiń esebinen jasalyp otyr», – dedi oblys basshysy.
Spıkerdiń sózinshe, UEFA-nyń talaptaryna baılanysty 2024 jyldan bastap stadıonnyń astynda jylý bolýy kerek.
«Merdiger osyny bizge jetkizgen soń, bıýdjette qaradyq. Jergilikti bıýdjetten arnaıy qarjy qoıyp, shym tóselgenshe jylý qubyrlaryn tartyp jatyrmyz. Endigi jyly iske qosylady», – dedi Darhan Satybaldy.
Sondaı-aq ol Túrkistan oblysynda 7 fýtbol klýby bolǵanymen, basymdyq «Turan» klýbyna beriletinin aıtty.
«Bizdiń negizgi klýb – «Turan». Sonyń ǵana bazasy bar. Odan basqa klýbtardyń standarttarǵa saı bazasy bolmaǵannan keıin birinshi, ekinshi lıgalarda oınaı beredi. Premer-lıgada ustaıtyn negizgi klýb «Turan» bolady», – dedi ákim.
