TÚRKSOI Bas hatshysy Aqtaýda ótken sharaǵa joǵary baǵa berdi
AQTAÝ. ASTANA. KAZINFORM – Búgin Mańǵystaý oblysynyń ákimi Nurdáýlet Qılybaı Halyqaralyq TÚRKSOI uıymynyń Bas hatshysy Sultan Raevpen kezdesti. Basqosýda 5 sáýir kúni ótken «Aqtaý – Túrki áleminiń astanasy» atty halyqaralyq mádenı sharanyń ashylý saltanaty qorytyndylanyp, aldaǵy josparlar talqylandy. Bul týraly oblys ákimdigi málim etti.
Taraptar jyl sońyna deıin josparlanǵan mádenı is-sharalar legin sapaly ári mazmundy ótkizý jóninde pikir almasty.
Sondaı-aq jıynda TÚRKSOI Bas hatshysy Sultan Raev aıtýly sharanyń joǵary deńgeıde uıymdastyrylǵanyn atap ótip, rızashylyǵyn bildirdi.
— Mundaı kólemdi, mazmundy ári ıdeıalyq jaǵynan tereń shara buryn-sońdy bolǵan emes. Shyn máninde, bulaı bolady dep kútpedim. Etnoaýylda halyqtyń bir-birimen etene aralasyp, qonaqjaılyq tanytyp, shynaıy baýyrmaldyǵyna kýá boldyq. Qatysýshylar men ónerpazdar dán rıza, — dedi Sultan Raev.
Óz sózinde oblys ákimi Nurdáýlet Qılybaı Mańǵystaýdyń tarıhı-mádenı bolmysyna toqtaldy.
— Memleket basshysy Qasym-Jomart Kemeluly Toqaev «Tarıhy tamyrlas, dástúri sabaqtas halyqtardyń yntymaqtastyǵyn odan ári nyǵaıtý — barshamyzdyń ortaq mindetimiz», — dep aıtqan edi. Rasynda da, Abyl men Esir, Qashaǵan men Súgir, Ábish Kekilbaev aǵamyz syndy uly tulǵalar dúnıege kelgen mekende mádenıet bolmaýy múmkin emes. Bul — rýhanııattyń qaınar kózi, mádenıettiń ordasy. «Aqtaý — Túrki áleminiń astanasy» sharasyna 100 myńǵa jýyq adam jınalyp, Mańǵystaýdyń mádenı áleýetin dáleldedi. Jyl sońyna deıin josparlanǵan is-sharalardy abyroımen ótkizemiz dep senemin, — dedi Nurdáýlet Qılybaı.
Eske sala keteıik, buǵan deıin Prezıdent Aqtaýǵa túrki áleminiń mádenı astanasy mártebesiniń berilýimen quttyqtaǵanyn jazǵan bolatynbyz.