TúrkPA-ǵa múshe elderdiń ózara taýar aınalymy 42 mlrd dollardan asqan

ASTANA. KAZINFORM – Túrki memleketterdiń Parlamenttik Assambleıasyna múshe elderdiń jıyntyq jalpy ishki ónimi 1,5 trln dollardan asady. Bul týraly Parlament Senatynyń tóraǵasy Máýlen Áshimbaev TúrkPA-nyń Astanadaǵy plenarlyq otyrysynda aıtty.

Onyń sózinshe, Túrki memleketteri Parlamenttik Assambleıasynyń mańyzy artyp kele jatyr.

– Qazirgi tańda bizdiń elderimizde 160 mıllıonnan astam halyq bar. Al, barlyq jalpy ishki ónim 1,5 trıllıon dollardan asady. Byltyr ózara taýar aınalymy 42 mıllıard dollardan asty. Syrtqy saýdanyń jalpy kólemi shamamen 1,3 trıllıon dollarǵa jetti. Bul kórsetkishter elderimizdiń ekonomıkalyq baılanysy jáne resýrstyq turǵydan ózin-ózi qamtamasyz etý deńgeıi artyp kele jatqanyn bildiredi, - dedi Máýlen Áshimbaev.

Buǵan deıin Qazaqstan, Ázerbaıjan, Qyrǵyzstan jáne Ózbekstan jáne Soltústik Kıpr Túrik Respýblıkasy parlamentteriniń spıkerleri Ulttyq ǵarysh ortalyǵyna baryp, ǵarysh apparattaryn qurastyrý-synaý kesheniniń jumysymen tanysqanyn jazǵan edik.