Túrkolog ǵalymnyń Mońǵolııada úsh kitabynyń tusaýy kesildi - sheteldegi qazaq tildi BAQ-qa sholý
Elnur Abdýraımov kásipqoı bokstaǵy alǵashqy tıtýlyn jeńip aldy - «ÓzA»
Kásipqoı boksqa birjola aýysqan ózbekstandyq bylǵary qolǵap sheberi, qandasymyz Elnur Abdýraımov (8-0, 7 KO) alǵashqy tıtýly IBF North American belbeýin jeńip aldy, dep habarlaıdy «ÓzA» aqparattyq agenttigi.
Atalǵan BAQ-tyń dereginshe, AQSh-tyń Kalıfornııa shtatynda uıymdastyrylǵan Golden Boy Fight Night kásipqoı boks keshinde Elnur meksıkalyq Leonel Morenony (11-3-1,9 KO) alǵashqy raýndtyń ózinde nokaýtqa jiberdi.
Bul týraly ol óziniń Instagram paraqshasynda da habarlap, qoldaý kórsetken barshaǵa alǵysyn bildirgen bolatyn.
10 raýndqa sozylǵan jekpe-jek 1 raýndta aıaqtaldy. Elnur jekpe-jektiń alǵashqy mınýtynyń sońynda sol qolymen kúshti soqqy jasap, qarsylasyn nokdaýnǵa túsirdi. Moreno bul soqqydan keıin jekpe-jekti jalǵastyra almaı qaldy.
Osylaısha Elnur 10-shy jekpe-jegin jeńispen aıaqtap, kásipqoı bokstaǵy alǵashqy IBF North American belbeýin ıelendi.
Aıta keteıik, Ýkıpedııada «Elnur Abdýraımov Nurǵalıuly 1994 jyly 10 maýsymda týǵan, jeńil salmaqtaǵy ózbek boksshysy, ulty qazaq, týǵan jeri Tashkent oblysynyń Bostandyq aýdany», dep jazylǵan.
Túrkolog ǵalym Qarjaýbaı Sartqojaulynyń úsh kitabynyń tusaýy kesildi - Kaznews
26 shilde kúni Baıan-Ólgıı aımaǵynyń Aqtan Babıuly atyndaǵy ortalyq kitaphanasynda belgili túrkitanýshy ǵalym, professor Qarjaýbaı Sartqojaulynyń úsh tomdyq «Orhon eskertkishiniń tolyq atlasy» atty eńbegi jáne «Kereılerdiń etnıkalyq tarıhy», «Tas kitaptyń qupııasy» atty úsh kitabynyń tusaýy kesildi, dep habarlaıdy mońǵolııalyq Kaznews aqparat agenttigi.
Saltanatty is-sharaǵa Baıan-Ólgıı aımaqtyq AÓH-nyń depýtaty Múptı Qabyluly, tarıhshylar Qabsator Omaruly, Ómirbek Bıqumaruly, aqyn-jazýshylar Rysbek Zurǵanbaıuly, Marat Bákeıuly, Ábijat Raıhanuly, Sezd Abaıqyzy, Amanjol Bádeluly jáne ózge azamattar qatysqan.
Mońǵolııalyq BAQ-tyń keltirgen deregine súıensek, belgili túrkitanýshy ǵalymnyń «Orhon eskertkishiniń tolyq atlasy» atty úsh tomdyq eńbeginde Mońǵolııa-Chehııa, Mońǵolııa-Túrkııa (TIKA), Mońǵolııa-Keńes odaǵy birikken ekspedıtsııalarynyń, L.N. Gýmılev atyndaǵy Eýrazııa ulttyq ýnıversıteti ekspedıtsııasynyń materıaldary, sondaı-aq álem túriktanýshylarynyń ǵasyrdan astam ýaqyt júrgizgen zertteýleriniń qorytyndysy paıdalanylǵan.
Al, «Kereılerdiń etnıkalyq tarıhy» atty kitapta Kereılerdiń etnıkalyq tarıhyn zertteý arqyly qazaq halqynyń tarıhy ǵasyrlar tereńinen bastalatynyn dáleldeıdi.
Sonymen qatar «Tas kitaptyń qupııasy» dep atalatyn eńbeginde professor, doktor Qarjaýbaı Sartqojaulynyń kóshpeliler mádenı qundylyqtaryna sońǵy jyldary jasalǵan ǵylymı maqalalary jınaqtalǵan. Onyń ishinde kóshpeliler tarıhy, dúnıetanymy, ıdeologııalyq qundylyqtary, rý-taıpalyq júıe zerttelýimen qatar, tas betindegi ejelgi hýnný jazýlary jáne arheologııalyq qazba muralardan tabylǵan kóne túrki mátinderi bar.
Aıta keteıik, eńbek arheolog, túrkitanýshy, tarıhshy, ádebıetshi, etnograftarmen qatar jalpy kóshpeliler tarıhyna qyzyǵýshy oqyrmandarǵa arnalǵan.
Mońǵolııalyq BAQ bul aqparattyń sońyn túrkolog ǵalymnyń qysqasha ómirbaıanymen túıindegen.
Qytaı ınvestıtsııalaǵan jel energetıkasy jobasy Qazaqstanda elektr qýatyn tarata bastady - «Halyq gazeti»
Apta basynda Qytaıdyń «Halyq gazeti» aqparattyq portalynda osyndaı taqyryptaǵy aqparat jarııalandy.
Jaqynda Qazaqstanda «Shelek» birinshi kezeńdik 60 megavatt jel energetıkasy jobasynyń alǵashqy bloktary elektr energııasyn óndirip, jelige sátti qosyldy.
«Shelek» – Power China kompanııasynyń Ortalyq Azııadaǵy jańartylatyn energııa kózderin paıdalanýdaǵy alǵashqy jobasy. 2017 jyldyń qyrkúıeginde joba «Qytaı-Qazaqstan óndiristik qýat yntymaqtastyǵy negizgi jobalarynyń» tizimine engen.
Qytaılyq BAQ-tyń dereginshe, qýaty 60 MVt bolatyn jel energetıkasy jobasy - Almaty oblysynyń Shelek aýdanynda. Munda jyl saıynǵy jobalyq qýaty 228 mln kVt/saǵ, qýattylyǵy 2,5 MVt bolatyn 24 jel týrbınasy ornatylǵan. Bul kómirqyshqyl gazynyń shyǵaryndylaryn jylyna 160 000 tonnaǵa azaıtýǵa teń bolatyndyqtan, Qazaqstannyń jańartylatyn energetıkany damytý josparyna oń úles qosatyn bolady.
Ózbekstanda Ortalyq Azııa men Reseı eńbek ınspektorlarynyń birinshi aımaqtyq forýmy ótedi - «ÓzA»
2022 jyldyń 9-12 tamyzynda Ózbekstan, Qazaqstan, Qyrǵyzstan, Tájikstan, Túrkimenstan jáne Reseı syndy elderden 60 sarapshynyń qatysýymen Ózbekstanda alǵash ret eńbek ınspektorlarynyń birinshi óńirlik forýmy ótedi, dep habarlaıdy «ÓzA» aqparattyq agenttigi.
«ÓzA» -nyń habarlaýynsha, Ózbekstan Respýblıkasynyń Jumyspen qamtý jáne eńbek qatynastary mınıstrligi Birikken Ulttar Uıymynyń Damý baǵdarlamasynyń qoldaýymen Ortalyq Azııa jáne Reseı memleketteri memlekettik eńbek ınspektorlarynyń birinshi aımaqtyq forýmyn uıymdastyrýda.
Іs-sharanyń negizgi maqsaty – Ortalyq Azııa aımaǵynda jáne Reseıde eńbek sektorynda memlekettik baqylaý saıasatyn ázirleý jáne júzege asyrýdaǵy yntymaqtastyqty nyǵaıtý. Sonymen qatar, biliktilikti arttyrý jáne ózara tájirıbe almasý arqyly eńbek ınspektorlarynyń bilim deńgeıin, iskerligi men tıimdiligin arttyrý.
Forým aıasynda qatysýshy elderdiń memlekettik eńbek ınspektsııasynyń ókilderi Halyqaralyq eńbek uıymynyń negizgi qaǵıdattaryn, kóshi-qon quqyǵy máselelerin, «Vision zero» («Nol injuries») tujyrymdamasy, óndiristegi jazataıym oqıǵalardy tergeý máseleleri talqylanady. Sondaı-aq, aýyl sharýashylyǵy salasyndaǵy eńbek zańnamasyna qatysty máseleler sarapqa salynady jáne memlekettik eńbek ınspektorynyń jeke, kásibı ósýine, emotsıonaldy basqarý daǵdylaryna jáne basqalarǵa baǵyttalǵan trenıngter ótkiziledi.
Ózbekstandyq BAQ-tyń keltirgen derekterine súıensek, is-sharanyń qorytyndysy boıynsha qaýipsiz eńbek jaǵdaılaryn qamtamasyz etý jáne Ortalyq Azııa aımaǵyndaǵy eńbek quqyqtaryn qorǵaýdyń zamanaýı tetikterin engizý tásilderi ázirlenetin bolady.
«Atap aıtqanda, forým azamattardyń eńbek quqyqtary men jumys berýshilerdiń múddelerin qorǵaý, sondaı-aq eńbek qaýipsizdigin, densaýlyǵyn qamtamasyz etý salasyndaǵy eń ózekti máselelerdi sheshý úderisine belsendi qatysatyn jas eńbek ınspektorlarynyń qoǵamdastyǵyn qalyptastyrýǵa qyzmet etedi», - dep túıindeıdi «ÓzA» aqparattyq agenttigi.
Sondaı-aq, osy aptada «ÓzA» aqparattyq agenttigi «Tashkentte ShYU-ǵa múshe memleketterdiń aımaq basshylarynyń forýmy ótedi» degen aqparat ta jaryq kórgen bolatyn.
«ÓzA» aqparattyq agenttiginiń dereginshe, 2022 jyldyń 3-4 tamyz kúnderi Tashkentte Ózbekstannyń Shanhaı yntymaqtastyq uıymyna tóraǵalyǵy aıasynda aımaqtyq kóshbasshylar forýmy ótedi.
Forýmnyń basty maqsaty– ShYU-ǵa múshe memleketterdiń nazaryn týrızmdi, mádenıet pen aýyl sharýashylyǵyn odan ári damytý máselelerine aýdarý.
Eki kúndik is-shara baǵdarlamasynda uıymǵa múshe elderdiń isker toptary ókilderiniń qatysýymen plenarlyq otyrys pen úsh pikirtalas sessııasy, bıznes-forým oryn alǵan.
Aıta ketý kerek, talqylaý sessııasy barysynda qatysýshylar aýyl sharýashylyǵy ónimderin óndirý jáne qaıta óńdeý, agroónerkásiptik keshenge ınnovatsııalyq tehnologııalardy engizý, azyq-túlik ónimderin óndirý, týrızm jáne kólik logıstıkasy salasyndaǵy yntymaqtastyq boıynsha birlesken joǵary tehnologııalyq jobalarǵa nazar aýdarady.
Eýropa-Qytaı poıyzy alǵash ret Almatyǵa jol tartty – «Halyq gazeti»
Shanhaı nómirli Qytaı-Eýropa kezekshi poıyzy alǵash ret Ortalyq Azııaǵa jol tartty.
Qytaıdyń «Halyq gazeti» aqparattyq portalynyń habarlaýynsha, 28 shilde kúni tústen keıin Shanhaı júk stantsııasynan 984,42 tonna júk tıelgen Shanhaı nómirli Qytaı-Eýropa kezekshi poıyz jolǵa shyqty. Bul - Shanhaıdan baǵyt alyp, Ortalyq Azııaǵa baratyn alǵashqy eksporttyq poıyz.
Qytaı-Eýropa kezekshi poıyzyna kondıtsıonerler men jylytqysh quraldary, peshter, velosıpedter, balalar arbalary, tigin mashınalary jáne basqa da turmystyq materıaldar tıelgen.
Bul poıyz Qorǵas pen Altynkól temirjol stantsııasy shekaralary arqyly ótip, sońynda Qazaqstannyń Almaty qalasyna jetedi.
