Túrkııanyń 10 provıntsııasynda 3 aıǵa tótenshe jaǵdaı rejımi engizildi
Túrkııa basshysy sońǵy málimet boıynsha, Túrkııada jer silkinisiniń qurbany 3 549 adam bolǵanyn, 22 168 adam jaraqat alǵanyn aıtty. Úıindiler astynan segiz myńnan astam adam qutqarylǵan.
«Biz Túrkııa tarıhyndaǵy ǵana emes, tutas aımaq pen álemdegi eń úlken apattardyń birine tap boldyq. Apat aımaǵynda jumys isteý úshin barlyq memlekettik qurylymdar, qyzmetkerler men tehnıkalar jumyldyryldy. Birinshi kezeńde apat aımaǵynyń turǵyndaryna shuǵyl kómek kórsetýge 100 mlrd lıra bólindi», - dedi R. Erdoǵan.
Zilzala aımaǵyna 54 myń shatyr, 102 myń kereýet, bastapqy qajetti zattar, 1000-ǵa jýyq jedel járdem vagondary, eki sanıtarlyq ushaq jiberildi. On provıntsııanyń turǵyndaryna 5 myń medıtsınalyq qyzmetker kómektesip jatyr.
Erdoǵannyń aıtýynsha, apat aımaǵynda 53 317 qutqarýshy jumyldyryldy. Olardyń sany Túrkııa men basqa elderdiń komandalarynyń arqasynda kún sanap artyp keledi. Sondaı-aq, Túrkııa prezıdenti alapat jer silkinisiniń saldaryn joıýda yntymaqtastyqqa shaqyrdy.
«Biz jalǵan aqparat pen feık arqyly qoǵamǵa alaýyzdyq taratý áreketterin kórip otyrmyz. Barlyǵy úshin ýaqyty kelgende jaýap alamyz», - dedi R. Erdoǵan.
Sonymen birge, prezıdent Túrkııa úkimeti janyndaǵy tótenshe jaǵdaı saldaryn boldyrmaý jáne joıý basqarmasynyń (AFAD) banktik shottaryna túrik lıralary men shetel valıýtasyndaǵy qarajat aýdarylǵany úshin komıssııa alynyp tastalǵanyn aıtty.
Aıta ketsek, Túrkııanyń ońtústik-shyǵysyndaǵy Gazıantep provıntsııasynda 6,4-6,6 magnıtýdaly, keıin 7,4 magnıtýdaly qýatty jer silkinisi boldy.
Qazaqstan Tótenshe jaǵdaılar mınıstrliginiń qutqarýshylary jer silkinisi saldaryn joıýǵa kómek kórsetý úshin Almatydan Túrkııaǵa attandy. Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qyzmettik ıtter bar.
Qazaqstandyq qutqarýshylar mingen ushaq Túrkııanyń Gazıantep qalasyna qondy.
Qazaqstan Túrkııanyń zardap shekken aýdandaryna jiberý úshin dárigerler brıgadasyn quryp, daıyn otyr. Bul týraly QR Densaýlyq saqtaý mınıstri Ajar Ǵınııat málim etti.
Qazirgi tańda Túrkııada qalǵan Qazaqstan azamattaryn Gazıantep qalasynan elge áketý sharalary júrgizilip jatyr. Elge qaıtamyn degen Qazaqstan azamattary 7 aqpan saǵat 12:00-de Gazıantep qalasynyń áýejaıynda tıisti protsodýradan ótip, daıyn bolýy tıis. Sonymen qatar, Qazaqstanǵa oralýǵa nıetti azamattar tizimin jasaý úshin +90 538 8807041, +90 3124919100 telefon nómerlerine habarlasýy kerek.
Foto: aa.com.tr