Túrkııanyń Cheshme kýrortynda orman órti tutandy
ASTANA. KAZINFORM — Túrkııanyń Egeı teńizi jaǵalaýynda, Izmır qalasyna qarasty tanymal Cheshme kýrortynda iri orman órti bastaldy, dep habarlaıdy Kazinform agenttiginiń menshikti tilshisi.
Órt taýly jáne oıly jerlerde tez taralyp, turǵyn úıler men týrıstik nysandarǵa jaqyndaǵan.
Jergilikti bıliktiń málimetinshe, jalyn orman alqabynyń edáýir bóligin sharpyǵan. Qatty jel órttiń ári qaraı taralýyna yqpal etip otyr. Qaýip aımaǵynda ornalasqan úsh eldi mekenniń turǵyndary evakýatsııalandy.
Túrkııanyń órt sóndirý jáne qutqarý qyzmetteri órtpen belsendi kúres júrgizip jatyr. Ondaǵan órt sóndirý kólikteri, arnaıy tehnıka men tikushaqtar, amfıbııalyq ushaqtar jumyldyrylǵan. Sonymen qatar, jandarmerııa qyzmetkerleri men eriktiler de kómekke tartylǵan.
Kýágerlerdiń aıtýynsha, tútinniń qoıý baǵandary ondaǵan shaqyrymnan kórinedi, al aýada kúıik ıisi qatty seziledi. Aımaqtaǵy týrısterge qaýip týraly eskertý jasaldy, keıbir qonaq úıler jolaýshylardy ishinara evakýatsııalaı bastady.
Órttiń shyǵý sebebi ázirge anyqtalǵan joq. Bılik ókilderi tabıǵı da, adamı faktorlardy da qarastyryp jatyr. Qazirgi ýaqytta arnaıy tergeý toptary oqıǵa ornynda jumys istep jatyr.
Túrkııanyń Orman jáne aýyl sharýashylyǵy mınıstrligi aımaq turǵyndary men qonaqtaryna saq bolýdy, órt oshaqtaryna jaqyndamaýdy jáne resmı aqparat kózderin muqııat baqylap otyrýdy eskertti.
Jaǵdaı áli de kúrdeli. Bılik órtti eldi mekender men týrıstik nysandarǵa taralmaý úshin bar kúshin salyp jatyr.
Qazirgi ýaqytta «Izmır–Cheshme» avtojolynyń Cheshmege baratyn baǵyty – Zeıtınler tólem pýnkti mańynda, al Izmırge baratyn baǵyty – Alachaty tólem pýnkti mańynda jabylǵan.
Sondaı-aq, Cheshmeniń eski jolynda da kólik qozǵalysyna shekteý qoıyldy: Cheshmeden Ýrla baǵytyna – Kýtlý Aktash sý qoımasy mańynda, al Ýrladan Cheshmege – Zeıtınler aıryǵy mańynda kólik júrisine tyıym salynǵan.
Túrkııanyń ishki ister mınıstri Alı Erlıkaıanyń aıtýynsha, Izmırde orman órti saldarynan 110 turǵyn úı men 2 kommertsııalyq nysan qatty zaqymdanǵan. Bıledjıkte – 69 turǵyn úı, 3 kommertsııalyq nysan, al Manısede – 5 turǵyn úı zardap shekken.
– Órt saldarynan turǵyn úı, kóshý jáne múlik shyǵyndaryn óteý úshin atalǵan óńirlerge jalpy somasy 21 603 400 túrik lırasy (shamamen 550 myń AQSh dollary) bólindi, – dedi mınıstr.
Buǵan deıin Túrkııanyń birneshe óńirinde orman órtteri sóndirilgeni habarlanǵan bolatyn. Alaıda aýa temperatýrasynyń joǵary bolýyna baılanysty órt qaýpi áli de saqtalyp otyr.