Túrkııanyń 100 stýdenti Arızona dıplomyn Qazaqstanda alady
PETROPAVL. KAZINFORM — Búgin Qozybaev ýnıversıteti óziniń halyqaralyq mártebesin nyǵaıtý jolynda Eurostar Overseas Education Consultancy (Túrkııa) kompanııasymen kelisimge qol qoıdy. Bul týraly Ǵylym jáne joǵary bilim mınıstrligi málim etti.
Eurostar Overseas Education Consultancy — 20 jyldan astam tájirıbesi men búkil álem boıynsha keń seriktestik jelisi bar halyqaralyq bilim berý salasyndaǵy jetekshi sarapshy. Kompanııa stýdentterge eń jaqsy ýnıversıtetterdi tańdaýǵa kómektesedi, akademııalyq máseleler boıynsha keńes beredi jáne sheteldik bilim berý baǵdarlamalaryn uıymdastyrady.
— Kelisim aıasynda jyl saıyn Petropavlǵa Túrkııa mektepterinen 100 túlek keledi. Olar oqýyn Foundation fakýltetinde bastaıdy: bir jyl qarqyndy aǵylshyn tilin oqyp, Arızona ýnıversıtetiniń qos dıplomdyq baǵdarlamalaryna túsýge daıyndalady, — delingen habarlamada.
Bıyl Arızona ýnıversıtetimen júzege asyrylatyn baǵdarlamalarǵa 350-den astam stýdent tústi, onyń 153-i qos dıplomdy tańdady. Qozybaev ýnıversıtetine qazirdiń ózinde Qytaıdan, AQSh-tan, endi Túrkııadan stýdentter kelip jatyr, bul — ýnıversıtettiń jahandyq bilim berý keńistiginiń bir bóligi bolǵandyǵynyń aıqyn dáleli.
Aıta keteıik, búgin Qazaqstan Respýblıkasy Prezıdentiniń Jarlyǵymen akademık E. A. Bóketov atyndaǵy Qaraǵandy ýnıversıtetine ulttyq joǵary oqý orny mártebesi berildi.