«Túrkııadaǵy jer silkinisi qoldan jasalǵan» - feık

ASTANA. QazAqparat – WhatsApp-ta Túrkııadaǵy joıqyn jer silkinisi qoldan jasalǵanyn dáleldeıdi delingen vıdeo tarady. Bul týraly sıýjet túrik telearnalarynyń birinde kórsetildi. Bul – shyndyqqa janaspaıdy, dep habarlaıdy QazAqparat Stopfake.kz-ke silteme jasap.

«Іs júzinde taralǵan vıdeo 2022 jyldyń qarasha aıynda Túrkııanyń birqatar aýdandarynda 6.1 balldyq jer silkinisi bolǵan kezde túsirilgen rolıkterden turady. Qazir taratylyp jatqan vıdeo úzindileri eldiń eki túrli bóliginde túsirilgen. Aýlasy jaryqtandyrylǵan úıdiń vıdeosy Dıýzdje qalasynda túsirilgen. Ekinshisi, kóp mashınalar kórsetilgen aq-qara tústi vıdeo Bıledjıktegi Oklýdja aýylynda túsirilgen», - dep jazady Stopfake.

Ekinshi vıdeoda kókjıekte jaryq jarqyldaıdy. Anyqtalǵandaı, bul jer silkinisiniń qoldan jasalǵandyǵynyń dáleli emes.

«Erekshe qubylysqa naqty túsindirme joq bolǵanymen, ol qastandyq teorııasynyń dáleli bola almaıdy.

Birinshiden, jaryq jarqyldaı bastaǵan kezde jerasty dúmpýleri bolyp jatqan edi. Demek, kerisinshe, jypylyqtaǵan jaryq jer silkinisinen nemese onyń saldarynan týyndaǵan.

Ekinshiden, álemde kúshti jer silkinisin qoldan jasaıtyn tehnologııa joq.

Sonymen qatar konspırologtar HAARP júıesi jer terbelisin týdyratyn qupııa qarý bolýy múmkin degen ıdeıalardy birneshe ret alǵa tartqan edi. Shyn máninde, Alıaska ýnıversıtetine tıesili bul júıe jerdiń ıonosferasyn baqylaýǵa arnalǵan. Ol aýa raıyna, tektonıkalyq plıtalardyń qozǵalysyna jáne basqa tabıǵı qubylystarǵa áser ete almaıdy.
Qoryta aıtqanda, Túrkııadaǵy jer silkinisi qoldan jasalmaǵan. Al taralǵan vıdeo – bul málimdemeni dáleldemeıtin eski rolıkter toptamasy», - dep qorytyndylanǵan saıtta.