Túrkııadaǵy qazaq jastaryn Aqordada qabyldady
"Jaqynda Túrkııaǵa saparmen barǵanda qazaq dıasporasymen úlken kezdesý ótkizdim. Sol kezde jastar týǵan elin bilse eken, jaqyn tanyssa eken dep, kelisken bolatynbyz. Sóıtip, senderdi kóptegen jastardyń ishinen iriktep, eń bilimdi, úsh tildi meńgergen úzdikterdi tańdap aldyq. Sol jerdegi zııaly qaýym aıtty. Sondyqtan senderdi osyndaı úlken jetistikpen quttyqtaımyn", - dedi G.Ábdiqalyqova kezdesýdiń basynda.
Memlekettik xatshy jastarmen Astananyń 20 jyldyǵy qarsańynda kezdesip otyrǵanyn erekshe atap ótti. Elordanyń otandyq ekonomıkanyń qozǵaýshy kúshine aınalǵanyn, mádenıet pen ónerdiń máıegi, ǵylym men jańashyldyqtyń ordasy, xalyqaralyq mańyzy bar sharalardyń oshaǵy bolyp otyrǵanyn da jetkizdi. Búginde rýxanı jańǵyrý, Bes áleýmettik bastama, ındýstrıaldy-ınnovatsııalyq damý, tsıfrlandyrý jáne taǵy basqa memlekettik baǵdarlamalar aıasynda úlken is-sharalar qolǵa alynyp jatyr.
"Qazaqstan jer kólemi jaǵynan dúnıejúzi boıynsha 9-shy orynda. Jerimiz - keń-baıtaq. Sondyqtan biz dıasporamen kezdeskende elge kelińizder, balalardy jiberińizder, osy jerde oqysyn, osy jerde jumys istesin, osy jerde qonystansyn dep, ylǵı aıtamyz", - dedi G.Ábdiqalyqova.
Aqordaǵa Túrkııadaǵy qazaq jastarynyń 10 ókili keldi. Olardyń ishinde Edige Doǵan da bar. Ákesi - túrik. Anasy - qazaq. Biraq ákesiniń naǵashy atasy qazaq eken. Búginde Edige Doǵan joǵary oqý ornynda quqyqtaný boıynsha bilim alyp júr. "Men ózim Túrkııada dúnıege keldim. Anam Óskemen jaqtan. Biz jylda kelip turamyz. Al Astanada tórt-bes ret boldym. Osy ýaqytttyń ishinde qala qatty ózgerdi. Qazir men tórtjyldyq oqýdy alyp jatyrmyn. Sosyn master oqýyn Túrkııada, ıa bolmasa, Eýropada alǵannan keıin Qazaqstanǵa kelip, eńbek etý - armanym", - dedi E.Doǵan jýrnalısterge bergen suxbatynda.
Nurbaný Qara bolsa, týǵan jerine osymen ekinshi ret kelip otyr. Onyń aıtýynsha, Túrkııada turatyn qazaq jastary únemi aralasyp turady. Alaıda Qazaqstandaǵy jastarmen baılanys joq. "Sheteldegi qazaq jastarynyń barlyǵy elin-jerin kórse eken deımin. Biz baqyttymyz. Sebebi Otanymyzǵa kelip, kórip júrmiz. Túrkııada oqyǵan qazaq stýdentteri bizben baılanysqa shyǵyp turady. Biraq kóp emes", - deıdi N.Qara.
Al Memlekettik xatshy Gúlshara Ábdiqalyqova Astanany aralaǵanda fotoǵa kóbirek túsýge keńes berdi. "Endi, sender Nazarbaev ýnıversıtetinde boldyńyzdar. Keshe fotolaryńdy kórdim. Odan bólek, «Hanshatyr», «Beıbitshilik jáne kelisim saraıy», «Astana-Opera», «EKSPO», «Nur-Álem» - osynyń barlyǵy baǵdarlamada bar. Kóresizder dep oılaımyn. Sosyn Túrkııaǵa barǵasyn barlyq qazaqtarǵa jetkizip, sýretterińizdi kórsetińizder. Qandaı ózgeristerdiń bolyp jatqanyn kórsin. Sonda qyzyǵýshylyq bolady. Elge oralatyn qazaqtardyń sany da kóbeıedi", - dedi G.Ábdiqalyqova.
