Túrkııadaǵy qazaq stýdentteri bas qosty

ALMATY. QazAqparat - Qazaqstannyń Túrkııadaǵy Elshiliginiń ǵımaratynda osy elde bilim alyp jatqan qazaqstandyq jastardyń qatysýymen «Halyqaralyq qaýymdastyqta Qazaqstannyń róli» atty «dóńgelek ústel» ótti, dep habarlaıdy QazAqparat qazaqstandyq dıplomatııalyq ókildikke silteme jasap.

Jıynǵa Qazaqstannyń Túrkııadaǵy Elshisi Abzal Saparbekuly, sondaı-aq Saıan Shylmámbetov, Ermuhamet Maralbek, Dinmuhamed Qasymbek, Erkin Qalıdolla, Dana Qasqabaeva, Darhan Ábishev, Erbolat Sarýarov syndy Hajettepe, Gazı, Ankara, Iyldyrym Baıazıt ýnıversıtetteriniń doktoranttary men magıstranttary qatysty.

Elshi A.Saparbekuly qazaqstandyq azamattardy Alǵys aıtý kúnimen quttyqtady. Sonymen qatar Elbasy N.Á.Nazarbaevtyń el halqyna arnaǵan Joldaýynyń negizgi baǵyttaryn túsindirip, «Bolashaqqa baǵdar: rýhanı jańǵyrý» atty maqalasy jaıly egjeı-tegjeıli aıtyp berdi.

Osy oraıda Gazı ýnıversıtetiniń magıstranty, ázerbaıjandyq Ahmat Hasanov beıbitshilikti saqtap, yntymaqty tý etken qazaq jurtyna alǵys aıtyp, kúlli Qazaq elin aıtýly merekemen quttyqtady.

Óz kezeginde, jas zertteýshi-ǵalymdar «BUU Qaýipsizdik Keńesi jáne Qazaqstannyń halyqaralyq qaýipsizdiktegi orny», «BUU qurylýy jáne onyń tarıhı mıssııasy», «Qazaqstan men BUU arasyndaǵy yntymaqtastyq», Shanhaı yntymaqtastyq uıymy jáne Qazaqstannyń geosaıası aspektileri», «BUU sheńberindegi lańkestikke qarsy kúres Qazaqstannyń lańkestikke qarsy kúrestiń zańnamalyq sharalary», «Túrki álemi jáne Qazaqstan», «Qazaqstan Respýblıkasynyń Dúnıejúzilik saqtaý uıymymen yntymaqtastyǵy» syndy taqyryptar tóńireginde baıandama jasady.

Jıyn sońynda A.Saparbekuly qazaq jastaryn Alǵys hattarmen marapattady.