Túrkııadaǵy tabıǵı apattar: ońtústikte — orman órtteri, soltústikte — tolassyz jańbyr
ASTANA. KAZINFORM — Túrkııa eldiń ártúrli óńirlerinde eki birdeı tabıǵı apatpen bir ýaqytta kúresip jatyr, dep habarlaıdy Kazinform agenttiginiń menshikti tilshisi.
Eldiń ońtústiginde, Antalıa provıntsııasyndaǵy tanymal týrıstik aýdan Manavgatta orman alqaptary órtenip jatsa, soltústikte, Qarateńiz óńirinde kúshti jańbyr saldarynan sý tasqyny men kóshkinder bolǵany belgili boldy.
Antalıadaǵy týrıstik aımaqta órt boldy
Keshe keshke Manavgat qalasyna qarasty Kýmkeı aýdanynda jaǵalaý mańyndaǵy qamyspen qalyń ósken qurǵaq aýmaqta órt shyqty. Antalıa gýbernatory Hýlýsı Shahınniń aıtýynsha, ystyq jáne jeldi aýa raıynyń saldarynan ot jyldam taralǵan. Alaıda órt sóndirý qyzmetteri oqıǵa ornyna jedel jetip, órttiń úlken aýmaqty sharpýyna jol bermeı, ony der kezinde oqshaýlady.
Saqtyq sharasy retinde jaqyn mańda ornalasqan qonaqúılerdiń biri evakýatsııalandy. Gýbernatordyń aıtýynsha, bul sheshim týrısterdi tútinniń áserinen qorǵaý maqsatynda qabyldanǵan. Qazirgi ýaqytta aımaqtaǵy qonaqúılerge qaýip joq, barlyq qyzmetter tolyq daıyndyq rejıminde jumys istep jatyr.
Qarateńiz jaǵalaýyndaǵy sý tasqyny men kóshkinder
Soltústik provıntsııalar — Rıze, Trabzon, Artvın jáne Gıresýnda basqa tabıǵı apat túri órship tur. 20 qyrkúıektiń túninde bastalǵan nóser jaýyndar ózenderdiń arnasynan asyp ketýine, joldardyń sý astynda qalýyna jáne kóshkinderdiń paıda bolýyna sebep boldy. Ásirese Rıze provıntsııasyndaǵy Ardeshen, Fyndykly, Kalkandere jáne Chamlyhemshın aýdandary qatty zardap shekti.
Tabıǵı apattan keıin ondaǵan adam úılerinde qamalyp qaldy. Qutqarý qyzmetteri bes adamdy, sonyń ishinde eki balany aman alyp shyqty. Týnka aýylynda kóshkin men sý tasqyny úılerge baratyn joldy japty. Onda evakýatsııa aýyr tehnıkanyń kómegimen júrgizildi.
Fyndykly aýdanynda Aryly jáne Chaglaıan ózenderindegi sý deńgeıi kúrt kóterilip, qatty sý tasqyndary boldy. Jergilikti turǵyndardyń aıtýynsha, 19-dan 20 qyrkúıekke qaraǵan túni kópir opyrylyp túsken. Qýanyshqa oraı qutqarý qyzmeti aldyn ala qulaǵan kópirge joldy jaýyp qoıǵan, sondyqtan qurbandar bolmady.
Eskertý jáne saqtyq sharalary
Túrkııanyń meteorologııalyq qyzmeti Qarateńiz óńiri úshin jańa eskertýler jasady. Al Antalıa gýbernatory azamattarǵa qurǵaq jáne jeldi aýa raıy jaǵdaıynda saq bolýǵa, ormanda ot jaqpaýǵa jáne pıknıkterden aýlaq bolýǵa shaqyrdy.
Buǵan deıin biz Túrkııada tabıǵı apattardyń aldyn alý úshin jańa mınıstrlik qurylatyny týraly jazǵan edik. Bul vedomstvo tabıǵı apattardyń aldyn alý jáne olardyń saldaryn joıý jónindegi jumystardy úılestiredi.