Túrkııada jalǵan dollar jasaıtyndar kóbeıip ketti

ASTANA. KAZINFORM – Jalǵan aqsha jasaıtyndar kóbinese 50 jáne 100 dollarlyq banknottardy tańdaıdy, dep habarlaıdy Kazinform agenttiginiń tilshisi.

Belgili bolǵandaı, jalǵan dollar negizinen Túrkııadaǵy eń iri jáne eń kóne bazarlardyń biri - Qapaly Charshyda taraıdy. Bul bazar Ystanbul qalasynda ornalasqan. Onda saýdagerler men týrısterdiń aǵyny mol ekendigin bilgen ár túrli elden kelgen qylmyskerler saýda jasaǵanda jalǵan dollarlardy paıdalanady.

Túrkııa bankter qaýymdastyǵy eldiń ekinshi deńgeıli bankterine qaýipsizdik sharalaryn kúsheıtýdi qatań túrde usynyp, resmı eskertý joldady. Jeke qarjy ınstıtýttary óz qyzmetkerlerine ásirese 50 dollarlyq banknottarmen jumys istegen kezde asa saq bolýdy tapsyrdy.

Qazirgi zamandaǵy jalǵan aqshalardyń sapasy óte joǵary bolǵandyqtan ony sanaý mashınalary men ýltrakúlgindi sáýleler arqyly teksergen kezde anyqtaı almaı qalý qaýpi joǵary. Sondyqtan bul máseleniń ózektiligi artyp otyr.

Avtorızatsııalanǵan aıyrbastaý pýnktteri qaýymdastyǵynyń tóraǵasy Mustafa Únver jalǵan dollardyń basym bóligi Azııa, Taıaý Shyǵys jáne Balqan elderinen keletinin aıtty.

«Jalǵan banknottardyń taralýy eldiń qarjy júıesine nuqsan keltirip, qolma-qol aqsha tólemderine degen senimdi azaıtady, - dedi ol.

Osyǵan deıin Túrkııaǵa zańsyz 190 kg altyn tasymaldaǵan transulttyq uıymdasqan top basshysy 11 jylǵa sottalǵany týraly jazdyq.