Túrkııada turatyn qazaqstandyqtar zardap shekkenderge 34 mln teńge jınady

ASTANA. QazAqparat – Túrkııada turatyn qazaqstandyqtar joıqyn zilzaladan zardap shekkenderge kómek kórsetý úshin 25 mln teńgeden astam qarajat jınady, dep habarlaıdy QazAqparat tilshisi.

Biz keshe aqsha jınaýdy bastadyq. Túnge deıin 25 mln teńge jınaldy. Birden sýpermarketke baryp, osy qarajatqa azyq-túlik pen qajetti zattardy satyp aldyq. Bárin júk kóligine tıep, Kahramanmarash qalasyna jiberdik. Qarajat jınaý dereý jabyldy. Alaıda, beı-jaı qaramaıtyn azamattar qarajat jiberýin toqtatpady. Osylaısha, taǵy 9 mln teńge jınaldy. Oǵan balalar tamaǵyn satyp alýdy josparlap otyrmyz

, - dedi «Shańyraq» meıramhanasynyń ıesi Danııar Imanbekov.

Bul kómekti uıymdastyrýdy belgili aıtysker-aqyn Aınur Tursynbaeva usynǵan. Olarǵa Stambýldaǵy QR Bas konsýldyǵynyń qyzmetkerleri de kómektesken.

Túrkııada turatyn qazaqstandyqtardyń jer silkinisinen zardap shekkenderge kómek qoryn ashqany týraly jazǵan bolatynbyz.

Sonymen birge, qazaqstandyq qutqarýshylardyń ekinshi eshelony Túrkııadaǵy joıqyn jer silkinisi bolǵan jerge attandy. Ekinshi eshelon quramynda jeke quramnan 60 adam, olardyń ishinde TJM qutqarýshylary, Apattar medıtsınasy ortalyǵynyń dárigerleri, qyzmettik ıtter bar.