Túrkııada orman órtteriniń 96 paıyzy adamnyń kesirinen bolǵan—Erdoǵan

ASTANA. KAZINFORM — Túrkııa halqy keıbir azamattyń tabıǵatqa nemquraıly qaraýynyń zardabyn tartyp otyr. El aýmaǵynda jyl basynan beri tirkelgen 4 247 orman órti oqıǵasynyń 96 paıyzy adamnyń kesirinen bolǵan, dep habarlaıdy AZERTADJ.

Bul týraly Túrkııa prezıdenti Rejep Taıyp Erdoǵan 28 shildede Ankarada ótken Mınıstrler kabınetiniń otyrysynan keıingi brıfıngte málimdedi.

Memleket basshysynyń aıtýynsha, orman alqaptaryna qasaqana órt qoıý jáne sabotaj áreketteri tirkelip jatyr.

— Órttiń týyndaýyna sebepker bolǵan árbir adam zań aldynda qatań jaýap beredi, — dedi Erdoǵan.

Sondaı-aq ol ótken jyldyń sońǵy 145 jyldaǵy eń ystyq jyl bolǵanyn eske saldy.

— Qatty ystyq, ylǵaldyń azdyǵy jáne qatty jel órt qaýpin arttyryp otyr. Bul jaǵdaıǵa baılanysty biz barlyq qajetti sharalardy qabyldadyq. Qazirgi tańda Túrkııanyń orman alqaptary 14 ushqyshsyz ushý apparaty (dron) jáne 776 baqylaý munarasy arqyly táýlik boıy baqylanady. Bul júıe órt oshaǵyn orta eseppen 2 mınýt ishinde anyqtap, 10–11 mınýt ishinde órt sóndirý jumystaryn bastap ketýge múmkindik beredi, — dedi prezıdent.

Onyń aıtýynsha, Túrkııa — orman monıtorınginde dron tehnologııasyn eń belsendi qoldanatyn eki eldiń biri.

Prezıdent Erdoǵan sondaı-aq óńirlik daǵdarystar men soǵystardy beıbit jolmen sheshý baǵytyndaǵy Túrkııanyń kúsh-jigerine toqtaldy.

— El shekaralaryna jaqyn aımaqtardaǵy daǵdarystar ýshyǵyp keledi. Al Ankara bul túıtkilderdi sheshý úshin bar kúshin salyp otyr. Reseı men Ýkraına arasyndaǵy soǵysqa kelsek, biz alǵashqy kúnnen bastap beıbitshilikti qoldap kelemiz. Bul soǵys tez arada toqtatylýy tıis, — dedi Túrkııa prezıdenti.

Sonymen qatar ol Túrkııa ár múmkindikti paıdalanyp, Ýkraına máselesi boıynsha joǵary deńgeıdegi kezdesý ótkizýge shaqyryp júrgenin atap ótti.

Buǵan deıin habarlanǵandaı, Túrkııada matrasyn jaqpaqshy bolǵan er adam ormandy órtep jiberdi.