Túrkııada orman órtteri saldarynan 407 turǵyn úı joıylǵan

ASTANA. KAZINFORM — Túrkııanyń Іshki ister mınıstri Alı Erlıkaıa sońǵy eki aıǵa jetpeıtin ýaqytta eldiń 13 provıntsııasynda orman órtterinen 407 turǵyn úı, 17 kommertsııalyq nysan jáne 96 sharýashylyq qurylys tolyqtaı joıylyp ne kúrdeli zaqymdanǵanyn málimdedi, dep jazady AZERTADJ.

Mınıstr Alı Erlıkaıa tabıǵı apattar aımaǵyndaǵy zalaldy óteý maqsatynda egjeı-tegjeıli taldaý júrgizilip jatqanyn aıtty.

Túrkııa Іshki ister mınıstriniń sózinshe, zardap shekkenderge memleket bólgen 128 mıllıon túrik lırasynyń 83 mıllıonnan astamy ótemaqy retinde tólendi.

— Baspanasyz qalǵan azamattar 105 modýldik úıge ornalastyryldy. Anomaldi ystyqtyń aıasynda barsha otandastarymdy barynsha saq bolýǵa shaqyramyn, — dep atap ótti mınıstr.

Túrkııa bıligi ormandy alqaptardaǵy órtterdiń basym kópshiligine adam faktory sebep ekenin birneshe ret málimdegen.

Orman órtteri máselesi búgin prezıdent Rejep Taıyp Erdoǵannyń tóraǵalyǵymen ótetin Ulttyq qaýipsizdik keńesiniń kún tártibine engizildi.

Aıta keteıik, Túrkııa halqy keıbir azamattyń tabıǵatqa nemquraıly qaraýynyń zardabyn tartyp otyr. El aýmaǵynda jyl basynan beri tirkelgen 4 247 orman órti oqıǵasynyń 96 paıyzy adamnyń kesirinen bolǵan. Bul týraly Rejep Taıyp Erdoǵan aıtty.

Jaqynda ǵana Túrkııada matrasyn jaqpaqshy bolǵan er adam ormandy órtep jibergeni anyqtaldy.

Buǵan deıin Túrkııada orman órtine baılanysty qamaýǵa alynǵandar sany 40-qa jaqyndaǵany habarlandy.