Túrkııada orman órtine baılanysty qamaýǵa alynǵandar sany 40-qa jaqyndady
ASTANA. KAZINFORM — Túrkııa prezıdenti Rejep Taııp Erdoǵan bıylǵy jaz maýsymyndaǵy orman órtine qatysy bar degen kúdikpen 40-qa jýyq adamnyń qamaýǵa alynǵanyn habarlady.
Bul týraly ol Mınıstrler kabıneti otyrysynyń qorytyndysynda halyqqa arnaǵan joldaýynda aıtty.
Erdoǵan bıylǵy jyly eldegi orman órtteriniń 96 paıyzynyń adamdardyń kesirinen bolǵanyn aıtyp, abaısyzda laqtyrylǵan temeki tuqyldary, tolyq sóndirilmegen jalyn, tipti lınza rólin atqarǵan áınek synyqtary sııaqty faktorlardy atady.
1 maýsymnan beri barlyǵy 149 adam ustaldy, onyń 38-i qamaýǵa alynyp, 61-i sot baqylaýynda. Ustalǵandardyń biri eldegi halqy eń kóp tórtinshi qala bolyp tabylatyn Býrsa mańyndaǵy órtke qatysy bar degen kúdikke ilingen.
Erdoǵan Túrkııanyń orman órtterimen belsendi kúresip jatqanyn da basa aıtty. Onyń aıtýynsha, 2020-2024 jyldar aralyǵynda Túrkııa Ispanııa, Italııa, Grekııa, Portýgalııa, AQSh jáne Kanadaǵa qaraǵanda azyraq ormandy joǵaltqan. Sondaı-aq Túrkııa barlyq Jerorta teńizi elderi arasynda arnaıy órt sóndirý ushaqtarynyń sany boıynsha kóshbasshy bolyp tabylady.
El boıynsha 27 órt sóndirý ushaǵy, 105 tikushaq, 6 myńǵa jýyq jerústi tehnıkasy jáne 25 myńǵa jýyq kásibı órt sóndirýshi jumyldyryldy. Maýsym aıynyń sońynan beri Túrkııada orman órtinen qaza tapqandar sany 17-ge jetti.
Eske sala keteıik, Túrkııadaǵy orman órtine baılanysty 17 adam qamaýǵa alynǵany aıtylǵan edi.