Túrkııada meıramhanada jarylys bolyp, 7 adam qaza tapty

ANKARA. QazAqparat - Túrkııanyń batysyndaǵy Nazıllı qalasynda meıramhanada turmystyq gaz ballony jarylyp, 7 adam qaza tapty jáne beseýi jaraqat aldy. Bul týraly Aıdyn provıntsııasynyń gýbernatory Hıýseın Aksoı málim etti, dep habarlaıdy QazAqparat TRT-ǵa silteme jasap.

Jarylys ǵımarattyń as bólmesinde jergilikti ýaqytpen saǵat 15:30-da ballon aýystyrý kezinde bolǵan. Provıntsııa gýbernatory Hýseın Aksoıdyń aıtýynsha, «qyzmetker ballonnan ıis shyǵyp turǵanyn málimdegen. Ekinshi qyzmetker ballon aýystyryp jatqanda, ol adamdardy syrtqa shyǵarǵan, keıin qysqa ýaqyt ishinde jarylys bolǵan».

Bul kezde meıramhanada 20-dan astam adam bolǵany, zardap shekkender aýrýhanaǵa jetkizilip, olardyń aýyr halde jatqany habarlandy.

Nazıllı qalasy prokýratýrasy osy oqıǵa boıynsha tergeý bastalǵanyn málim etti. Ol úshin 3 prokýror taǵaıyndaldy, sondaı-aq jarylysqa kináli 5 adam ustalǵan.

Foto: twitter.com/sahmettinyuksel