Túrkııada matrasyn jaqpaqshy bolǵan er adam ormandy órtep jiberdi

ASTANA. KAZINFORM — Osy jyldyń 22 shildesinde Túrkııanyń Sakarııa provıntsııasynyń Akıazy aýdanynda er adam óziniń eski matrasyn jaqpaqshy bolyp, ormandy órtep jiberdi.

Bul týraly eldiń ishki ister mınıstri Alı Erlıkaıa H-taǵy paraqshasynda jazdy.

Erlıkaıa 22-27 shilde aralyǵynda bolǵan orman órtine baılanysty barlyǵy 7 kúdiktiniń ustalǵanyn, olardyń 3-iniń túrmede ekenin, 4-iniń sot baqylaýymen bosatylǵanyn habarlady.

— 22 shildede Akıazy aýdany Boztepe yqsham aýdanynda bastalǵan órtke A.B esimdi adam sebepshi bolǵan. Eski matrasyn jaqpaqshy bolǵan kezde órt ormanǵa taralyp ketken. A.B. qamaýǵa alyndy, — dedi Erlıkaıa.

Alapat órt eldiń basqa aımaqtarynda da órship tur. Qorshaǵan orta jáne ýrbanızatsııa mınıstri Murat Kýrýmnyń aıtýynsha, ótken aptada Antalııa, Bıledjık, Býrsa, Karabúk, Sakarııa jáne Ýshak provıntsııalarynda orman órtinen 104 nysan, onyń ishinde 68 úı qatty zaqymdalǵan nemese qıraǵan.

Eske sala keteıik, Túrkııa orman órtimen kúresip jatyr.