Túrkııada gazdyń jańa qory tabyldy

ANKARA. Anadoly - QazAqparat – Túrkııa prezıdenti Rejep Taıyp Erdoǵan Qara teńizde gazdyń mol qory tabylǵanyn aıtty, dep habarlaıdy QazAqparat Anadolyǵa silteme jasap.

Túrkııanyń «Fatıh» burǵylaý kemesi Qara teńizdegi Chaıdjýma-1 ken ornynda 3023 metr tereńdikte 58 mlrd tekshe metr tabıǵı gaz qoryn tapqan.

«Qara teńizdegi tabıǵı gaz qorymyz 170 mlrd tekshe metrge artyp, jalpy kólemi 710 mlrd tekshe metrge jetti. Sonymen qatar Túrkııada kúndelikti munaı óndirý kólemi 80 myń barrelge jetti. Kelesi jyly bul kórsetkishti 100 myń barrelge jetkizýdi maqsat etip otyrmyz. Biz Túrkııany Kaspıı, Jerorta teńizi jáne Taıaý Shyǵystyń energetıkalyq ortalyǵyna aınaldyrýǵa bel baıladyq. Túpki maqsatymyz – sheteldik munaı men tabıǵı gazdan tolyqtaı bas tartyp, Túrkııanyń energetıkalyq táýelsizdigin jarııalaý», – dedi Túrkııa basshysy.

Foto: Anadoly agenttigi