Túrkııada bes jasar bala úıindi astynan 52 saǵattan keıin shyǵaryldy

ANKARA. QazAqparat – Sársenbi kúni Túrkııanyń ońtústik-shyǵysyndaǵy Hataı provıntsııasynda joıqyn jer silkinisinen 52 saǵat ótken soń bes jasar bala úıindi astynan qutqaryldy, dep habarlaıdy QazAqparat Sabah-qa silteme jasap.

Bes jasar qyzdy qutqarýshylar aman alyp qaldy. Ol qıraǵan úıdiń astynda qalǵanymen, eshqandaı jaraqat almaǵan. Bala jaqyn jerdegi aýrýhanaǵa jetkizdi.

Sonymen qatar Anadoly agenttiginiń habarlaýynsha, Hataı provıntsııasynda jer silkinisinen 49 saǵattan keıin taǵy bir jasóspirim qyz úıindi arasynan qutqaryldy.

Aıta ketsek, Qazaqstan Tótenshe jaǵdaılar mınıstrliginiń qutqarýshylary jer silkinisi saldaryn joıýǵa kómek kórsetý úshin Almatydan Túrkııaǵa attandy.

Onyń quramynda Qazaqstannyń respýblıkalyq jedel qutqarý jasaǵynyń qutqarýshylary, medıtsınalyq qyzmetkerler jáne qutqarýshy ıtter bar.

Tıisti tapsyrmany Qazaqstan Prezıdenti Qasym-Jomart Toqaev berdi. Qazaqstan Túrkııaǵa shuǵyl kómek retinde 1 mıllıon dollar beredi.

Túrkııa Prezıdenti Rejep Taıyp Erdoǵan eldiń ońtústik-shyǵysynda bolǵan joıqyn jer silkinisine baılanysty 12 aqpanǵa deıin jeti kúndik ulttyq aza tutý jarııalady.

Sońǵy málimet boıynsha Túrkııada zilzala qurbandarynyń sany 6,2 myńnan asty.