Túrkııada balalar merekesi atalyp ótti
Balalar merekesinde Ankaradaǵy Anytkabır mavzoleıi aldynda, al basqa qalalarda Mustafa Atatúriktiń eskertkishi janynda resmı jáne saltanatty sharalar ótkiziledi.
Qalalardyń ortalyqtary, mektepter men basqa da qoǵamdyq oryndarǵa respýblıka negizin qalaǵan tulǵanyń portreti, tý jáne sharlar ilinedi. Úkimettiń ókilderi oqý oryndaryn aralap, balalardy quttyqtaıdy. Al, balalar bolsa, memlekettik týdyń túsine sáıkes aq-qyzyl kıim kıedi.
Jergilikti turǵyndardyń aıtýynsha, balalardyń bir kúnge memlekettik mekemelerdegi, mınıstrlikter men vedomstvolardaǵy eresekterdiń qyzmetin atqarý dástúri de bar. Olar úkimet pen qoǵamdaǵy ózekti máselelerdi talqylap, konferentsııalarǵa da qatysa alady.
Balalar úshin bul mereke táttiler men syılyqtar alatyn kún. Mereke qarsańynda dúkenderdiń kóbinde oıynshyqtar, tátti taǵamdar men balalarǵa arnalǵan kitaptar jappaı satylymǵa shyǵarylady. Mundaı kezde 50%-ǵa deıin jeńildikter júredi.
Budan biraz ýaqyt burynǵa deıin merekeniń shyǵý tarıhy azdap umyt qalǵan. Bul kúnniń mán-mańyzy týraly túrli nusqalar bolǵan. Alaıda, 23 sáýir birden birneshe oqıǵany ushtastyrǵany anyq.
1920 jyly dál osy kúni túrik parlamenti qurylǵan – Túrkııanyń uly ulttyq jınalysy. Osydan bir jyl ótkennen keıin zań júzinde 23 sáýir – eldegi alǵashqy ulttyq mereke bolyp jarııalandy. Onyń ataýy da solaı bolǵan – «23 sáýir ulttyq merekesi». Ol kezde Túrkııa áli de sultanat bolyp turǵan. 1923 jyly el Túrkııa Respýblıkasy bolyp jarııalanǵannan keıin ǵana bul mereke - ulttyq egemendik kúni retinde atalyp óte bastady.
Al, balalar merekesi respýblıkanyń alǵashqy prezıdenti Mustafa Atatúriktiń bastamasymen 1927 jyly paıda boldy. Osylaısha, Túrkııada ulttyq egemendik jáne balalar kúni belgilendi.
Eske sala ketsek, Qazaqstanda balalarǵa ushaqpen tegin ushýǵa múmkindik beretin baǵdarlamaǵa suranys bolmaı otyr.