Túrkııada atom elektr stantsııasyna qatysty referendým bastaldy
ANKARA. KAZINFORM – Qazaqstanda atom elektr stansasyn (AES) salý jónindegi respýblıkalyq referendým bastaldy. Bul másele boıynsha daýys berý elden tys jerlerde de ótýde. Túrkııa Respýblıkasynda uıymdastyrylǵan úsh ýchaskede qazaqstandyqtardyń belsendiligi joǵary, dep habarlaıdy Kazinform agenttiginiń menshikti tilshisi.
Qazaqstannyń Túrkııadaǵy dıplomatııalyq ókildikterinde jumys isteıtin №418, 387 jáne 428 saılaý ýchaskelerinde daýys berý jergilikti ýaqyt boıynsha tańǵy saǵat 7:00-de (Astana ýaqytymen saǵat 9:00) bastalyp, 20:00-ge deıin jalǵasady.
Túrkııada demalys kúnine qaramastan tańerteńnen beri saılaýshylardyń belsendiligi baıqaldy. Týǵan jerinen jyraqta azamattyq ustanymyn tanytqandardyń deni – stýdentter men osynda turatyn qazaqstandyqtar.
Qazaqstannyń Túrkııadaǵy elshiliginiń málimetinshe, Ankaradaǵy №418 saılaý ýchaskesinde 1000-nan astam, al Ystanbul men Antalııada 2000-ǵa jýyq saılaýshy daýys beredi dep kútiledi.
Saılaýshylar belsendilik tanytyp otyr. Munda azamattyq boryshyn óteý úshin qala turǵyndary ǵana emes, Ankara konsýldyq okrýginiń 20 provıntsııasynda turyp, bilim alyp jatqan jastarymyz da kelip jatyr.
Keıbir stýdentterdiń ótinishimen elshilik qyzmetkerleri arnaıy kólik uıymdastyryp, jastarymyzdy Túrkııa astanasyna jetkizdi. Bul rette olarǵa respýblıkalyq referendýmǵa oraı buqaralyq sporttyq baǵdarlama uıymdastyrylyp, qazaqtyń dástúrli taǵamdarynan dám-tuz usynyldy. Belgili bolǵandaı, kóptegen stýdentter baýyrsaq, qazy, palaý, kóje, jalpy ulttyq dámdi saǵynyp qalǵan.
Qazaqstannyń Túrkııadaǵy elshiligi janyndaǵy ýchaskelik komıssııanyń tóraǵasy Asqar Tólepbergenıdiń aıtýynsha, referendýmǵa halyq tańnan beri óz tańdaýyn jasaýǵa kelip jatyr.
«Biz jumysty tańǵy saǵat 7:00-de bastadyq, saılaýshylar legi birden baıqaldy. Qazirgi kezde stýdentter belsendiligi óte joǵary. Týǵan jerinen jyraqta júrgen qazaqstandyq jastardyń saılaý ýchaskelerine bar yntasymen kelip, óz tańdaýyn jasap jatqanyna qýanyshtymyn. Barlyǵy ádettegideı ótip jatyr. Tártip buzý joq. Barlyǵynyń kóńil-kúıi kóterińki», – dedi A.Tólepbergenı.
Sonymen qatar, saılaý komıssııalarynyń músheleri Túrkııada ashylǵan úsh saılaý ýchaskesinde de saılaýshylar úshin barlyq jaǵdaı jasalǵanyn jáne buǵan deıin osyndaı is-sharalardy ótkizý tájirıbesi bar Qazaqstannyń dıplomatııalyq ókildikteriniń tájirıbeli qyzmetkerleri tartylǵanyn atap ótti.
Túrkııadaǵy túrli halyqaralyq uıymdar ókilderiniń arasynan táýelsiz baqylaýshylardyń aıtýynsha, saılaý zańnamasy men daýys berý tártibin buzý faktileri tirkelmegen. Jumys belgilengen standarttar aıasynda júrip jatyr.
Eske salaıyq, búgin qazaqstandyqtar atom elektr stantsııasyn salý máselesi boıynsha jalpyulttyq referendýmda daýys beredi.
Respýblıkalyq referendým bıýlleteninde bir ǵana saýal bolady: Siz Qazaqstanda atom elektr stantsııasyn salýǵa kelisesiz be? Daýys berýshi jaýaptyń eki nusqasynyń birin tańdaıdy: «Iá, kelisemin» nemese, «Joq, kelispeımin».
Memlekettik keńesshi Erlan Qarın AES salýǵa qatysy referendýmda elordadaǵy №164 daýys berý ýchaskesinde óz tańdaýyn jasady.
Premer-mınıstr Oljas Bektenov Astana qalasyndaǵy Oqýshylar saraıynda ornalasqan №61 ýchaskege kelip daýys berdi.
Osyǵan deıin Almaty ákimi Erbolat Dosaevtyń jubaıymen birge daýys berý ornyna kelgeni týraly jazǵan edik.
Ózderiniń konstıtýtsııalyq quqyǵyn Koreıa Respýblıkasyndaǵy Qazaqstan azamattary alǵashqylardyń biri bolyp júzege asyrdy.
Sondaı-aq, Beıjińdegi Qazaqstan Respýblıkasynyń Elshiligi men Shanhaı jáne Gonkongtaǵy Qazaqstannyń bas konsýldyqtarynda Atom elektr stansasyn (AES) salý jónindegi respýblıkalyq referendýmǵa daýys berý pýnktteri ashyldy.
Ózbekstan astanasynda ornalasqan Qazaqstan elshiliginiń janyndaǵy referendým ýchaskesi jergilikti ýaqyt boıynsha saǵat 07:00-de óz jumysyn bastady.
1 shildedegi jaǵdaı boıynsha el kóleminde 12 176 968 adam referendýmda daýys berýge haqyly.
