Túrkııada arnaıy operatsııa kezinde myńnan astam qylmysker ustaldy

Túrkııada «Aınalym-7» ataýymen ótken arnaıy operatsııa kezinde túriktiń kúshtik qurylymdary myńnan astam qylmyskerdi ustady, onyń ishinde buǵan deıin izdeýde bolǵandary da bar, dep habarlaıdy Kazinform agenttiginiń menshikti tilshisi.

Túrkııanyń Іshki ister mınıstri Alı Ierlıkaıa óziniń H áleýmettik jelisinde (burynǵy Twitter) ustalǵandardyń bir bóligi 20, tipti odan da uzaq jyl bas bostandyǵynan aıyrylýy múmkin ekenin jazdy.

- Eldiń 81 provıntsııasynda bir ýaqytta júrgizilgen arnaıy operatsııa kezinde 24 myńnan astam kúshtik qurylym qyzmetkeri túrli qylmys jasaǵan 1034 adamdy ustady, - dedi vedomstvo basshysy.

Polıtsııa qyzmetkerleri, jandarmerııa, TR ІІM arnaıy maqsattaǵy jasaǵy, sonymen qatar áskerı qyzmetkerler kúdiktiler men izdeýde júrgenderdiń panalap otyrǵan ornyna reıd júrgizdi. Kúshtik vedomstvolar 4 myńnan astam úı men páterdi tekserdi.

Arnaıy operatsııa kezinde adam óltirgeni úshin izdeýde bolǵan 13 qylmysker, lańkestik uıymǵa múshe 9 adam ustaldy. Qolǵa túsirilgenderdiń 342-i túrli qylmys jasaǵany úshin, onyń ishinde urlyq pen alaıaqtyq jasady degen kúdikpen qamaýǵa alyndy. 239 azamat qaraqshylyq úshin izdestirilip jatqan eken. Ustalǵandardyń ishinde 90 adamnyń esirtki jáne qarý satýmen baılanysy bar.