Túrkııada 1 sáýirden bastap 5G jelisi kommertsııalyq paıdalanýǵa beriledi

ASTANA. KAZINFORM – 1 sáýirden bastap Túrkııanyń mobıldi operatorlary besinshi býyn baılanys jelisin – 5G tehnologııasyn kommertsııalyq negizde iske qosa bastaıdy, dep habarlaıdy Kazinform agenttiginiń menshikti tilshisi.

5G jelisiniń iske qosylatyny týraly Túrkııanyń Kólik jáne ınfraqurylym mınıstri Abdýlkadır Ýraloglý málimdedi. Onyń aıtýynsha, jańa tehnologııa derekterdi berý jyldamdyǵyn aıtarlyqtaı arttyryp, 20 Gbıt/s-qa deıin jetkizýge múmkindik beredi.

Mınıstrdiń sózinshe, 23 aqpanda Túrkııada alǵashqy uıaly telefon qońyraýy shalynǵanyna 22 jyl toldy. Tarıhı áńgime 1994 jyly sol kezdegi premer-mınıstr Tansý Chıller men prezıdent Súleıman Demırel arasynda ótken. Sodan beri el birinshi jáne ekinshi býyn jelilerinen 4G jáne 5G standarttaryna deıingi joldan ótti.

5G tehnologııasyn engizýge arnalǵan lıtsenzııalardy 2025 jylǵy qazanda ótken jıilik aýktsıonynyń qorytyndysy boıynsha eldiń úsh iri mobıldi operatory aldy. Sonymen qatar ınfraqurylymdy damytý jumystary da qatar júrgizildi. Túrkııadaǵy talshyqty-optıkalyq jelilerdiń jalpy uzyndyǵy 657 myń shaqyrymǵa jetti.

Qazirgi tańda elde 99 mıllıonnan astam mobıldi abonent bar. Onyń ishinde 91 mıllıony 4,5G jelisin paıdalanady.

Mamandardyń aıtýynsha, 5G engizilýi onlaın-oıyndar, telemedıtsına, onyń ishinde qashyqtan jasalatyn operatsııalar sııaqty salalardyń damýyna serpin beredi. Sondaı-aq ekonomıkany jáne memlekettik qyzmetterdi tsıfrlyq transformatsııalaýdy jedeldetedi.

Buǵan deıin Túrkııada áleýmettik jelilerge qatysty talap kúsheıip jatqany habarlanǵan bolatyn.