Túrkııa zerthanalary túrki elderiniń arheologtaryna tanystyryldy
ASTANA.KAZINFORM - Túrki elderi arheologtarynan quralǵan delegatsııalar Hadjettepe ýnıversıtetiniń antropologııa zerthanasynda boldy, dep habarlaıdy Kazinform menshikti tilshisi.
Halyqaralyq Túrki akademııasy janynan qurylǵan Túrki áleminiń arheologııalyq zertteý ınstıtýttary men ortalyqtary qaýymdastyǵynyń (ARICA) ekinshi otyrysy qarsańynda túrki elderiniń jetekshi arheologtary arheologııa men antropologııa salasyndaǵy zamanaýı ǵylymı-tehnıkalyq jetistiktermen tanysý úshin Ankarada bas qosty.
Kezdesýge Túrki akademııasynyń prezıdenti Shahın Mustafaev, Hadjettepe ýnıversıtetiniń rektory Mehmet Djahıt Gıýran, Túrik tarıh qoǵamynyń prezıdenti ıÝksel Ózgen, Atatúrik tusyndaǵy Mádenıet, til jáne tarıh Joǵarǵy keńesiniń tóraǵasy Derıa Ers, sondaı-aq Qazaqstan, Qyrǵyzstan, Túrkııa, Ázerbaıjan, Vengrııa, Mońǵolııa elderiniń jetekshi arheologtary men ǵalymdary qatysty.
Belgili bolǵandaı, bul kezdesý 2023 jyly Samarqandta ótken ARICA-nyń quryltaı jınalysynda Halyqaralyq Túrki akademııasy kótergen bastamanyń jalǵasy boldy. Ol kezde túrki elderinde zamanaýı zerthanalyq qondyrǵylardyń joqtyǵyna nazar aýdaryldy, sol sebepti arheologııalyq oljalar Túrki memleketteri uıymyna (ATS) múshe memleketterden tys jerlerge taldaýǵa jıi jiberiledi.
- Biz ǵylymı ınfraqurylymymyzdy nyǵaıtyp, álemdik deńgeıdegi zertteýlerdi óz elderimizde júrgizýimiz kerek. Bul tek ǵylym emes, mádenı egemendik máselesi. Búginde ǵalymdarymyz jádigerlerdi taýyp qana qoımaı, myńdaǵan jyldar buryn ómir súrgen adamdardyń beınelerin jańǵyrtýda, - dedi Túrki akademııasynyń prezıdenti Shahın Mustafaev.
Sondaı-aq ol túrki arheologııasy salasyndaǵy ortaq ǵylymı jáne aqparattyq keńistikti qalyptastyrý alańy retinde ARICA qurýdyń mańyzdylyǵyn atap ótti. Bul uıym ǵalymdardyń ortaq ǵylymı tilde kásibı pikir almasýyna jáne túrki halyqtarynyń ortaq tarıhynyń jańa betterin birlesip ashýǵa yqpal etedi.
Búginde Túrki akademııasy men Hadjettepe ýnıversıteti arasyndaǵy yntymaqtastyq ǵylymı negizde tabysty damyp keledi. Máselen, 2024 jyly Mańǵystaý óńirinde júrgizilgen arheologııalyq qazba jumystary kezinde tabylǵan jádigerler ýnıversıtettiń arheologııalyq jáne antropologııalyq zertteýlerge jiberildi.
Osyǵan deıin Túrki memleketteri uıymyna múshe elderdiń sport mınıstrleri Tashkentte bas qosqany týraly jazdyq.