Túrkııa Sırııadaǵy saıasatynyń 3 negizgi basymdyǵyn belgiledi

ASTANA. KAZINFORM – Túrkııa Sırııaǵa qatysty júrgizip jatqan saıasatynyń negizgi 3 basymdyǵyn aıqyndady, dep habarlaıdy Kazinform tilshisi Hurriyet gazetine silteme jasap.

Túrik basylymynda jazylǵandaı, bul baǵyttar turaqty jáne qaýipsiz Sırııany qurýǵa, lańkestikpen kúresýge jáne gýmanıtarlyq máselelerdi sheshýge baǵyttalǵan.

Túrkııanyń birinshi basymdyǵy - Sırııany ótpeli kezeńnen sátti ótkizý, demokratııaǵa negizdelgen jańa beıbit memleket qurý. Onyń ishine eldi ekstremıstik toptardan tazartý, saıası jáne ınstıtýtsıonaldyq jaǵdaı jasaý kiredi. Bul protsestiń mańyzdy bóligi - adam quqyǵy men ádilettilik negizinde jumys isteıtin ótpeli ákimshilik qurý bolmaq.

Ekinshi basymdyq - Túrkııada jáne basqa da birqatar memlekette terrorıstik uıym bolyp sanalatyn «Kúrdistan jumysshy partııasy» jáne onyń sırııalyq bólimshesi «Halyqtyq qorǵanys jasaǵymen» kúresý. Bul aımaqtaǵy qaýipsizdik pen turaqtylyqtyń negizgi faktorlarynyń biri bolady dep kútilýde.

Úshinshi basymdyq - áskerı qaqtyǵystar saldarynan elin tastap ketýge májbúr bolǵan sırııalyq bosqyndardy qaıtarý. Túrkııa bosqyndardyń elge oralýy úshin qaýipsiz ortany qamtamasyz etpek.

- Túrkııa Sırııa oppozıtsııasyn eldiń qalpyna keltirý protsesiniń barlyq kezeńinde qoldaý kórsetýdi jalǵastyrady. Sondaı-aq ekstremızmnen ada jáne ádilettilik qaǵıdattaryna negizdelgen jańa Sırııanyń qurylysyna belsendi qatysady, - dep jazdy túrik gazeti.

Osǵan deıin Sırııanyń keıbir qalalarynda komendanttyq saǵat engizilgenin habarladyq.