Túrkııa prezıdenti Grekııa premer-mınıstrimen kezdesti

ASTANA. KAZINFORM – Túrkııa men Grekııa belgili bir kúrdeli qarym-qatynas kezeńinen keıin ekijaqty baılanys ornatýda. Bul memleketter NATO-ǵa múshe bolǵanyna qaramastan, Egeı teńizindegi shekaralar, Kıprdiń aýmaqtyq bólinýi jáne aımaqtaǵy zańsyz kóshi-qon jaǵdaıy týraly uzaq ýaqyt daýlasyp keledi.

Búgin grek premer-mınıstri Kırıakos Mıtsotakıs Ankaraǵa baryp, Túrkııa prezıdenti Rejep Taıyp Erdoǵanmen kezdesti. Buǵan deıin eki eldiń kóshbasshylary 2023 jyldyń jeltoqsanynda R. T. Erdoǵannyń Afınaǵa saparynda kezdesken edi. Jalpy, bir jyl ishinde bul – olardyń tórtinshi kezdesýi.

Erdoǵannyń shaqyrýymen Ankaraǵa kelgen Mıtsotakıstiń saparynda Túrkııa men Grekııa arasyndaǵy túrli salalardaǵy ekijaqty qatynastar qarastyryldy. Taraptar yntymaqtastyqty damytý úshin qabyldanýy múmkin aldaǵy qadamdardy talqylady. Sonymen birge, eki tarap ózekti óńirlik jáne jahandyq máseleler boıynsha pikir almasty. Kún tártibinde qos memleket qatynastarynyń sharttyq negizin nyǵaıtýǵa yqpal etetin kelisimderge qol qoıý máselesi de bolǵan.

Kóshbasshylardyń aıtýynsha, yntymaqtastyq ekonomıka, saýda, týrızm, densaýlyq saqtaý jáne kólik sııaqty salalarda tereńdeı túsedi.

Túrik sholýshylarynyń baǵalaýynsha, Ankaradaǵy ekijaqty baılanystar Erdoǵannyń 7 jeltoqsandaǵy Afınaǵa saparynyń jalǵasy retinde qarastyrylady. Sodan keıin qol qoıylǵan «Afına dostyq jáne tatý kórshilik deklaratsııasy» da búgin Ankarada bolyp jatqan kelissózderdiń negizi bolyp sanalady.

Osy qujatqa qol qoıylǵan soń eki tarap dostyq qarym-qatynasty, ózara syılastyqty, beıbit qatar ómir súrýdi jáne ózara túsinistikti damytýǵa kelisti. Bul rette taraptar arasyndaǵy barlyq daýlardy halyqaralyq quqyqqa sáıkes beıbit ýaǵdalastyqtar arqyly sheshý aıtylǵan.