Túrkııa Izraıl prezıdenti úshin áýe jolyn jaýyp tastady

ASTANA.KAZINFORM — Izraıl bıligi Bakýde ótip jatqan Birikken Ulttar Uıymynyń (BUU) Klımattyń ózgerýi jónindegi taraptardyń 29-shy konferentsııasyna (COP29) qatysýdy josparlaǵan Izraıl prezıdenti Itshak Gertsogtyń ushaǵy úshin túrik áýe keńistigin paıdalanǵysy keldi, dep jazady TRT.

Túrkııa Izraıl Prezıdenti ushaǵynyń túrik áýe keńistigin paıdalaný týraly ótinishin qabyldamady, al Izraıl baspasózinde Itshak Gertsogtyń «qaýipsizdik máselelerine» baılanysty Ázerbaıjan saparynan bas tartqany týral habarlamalar tarady. 

COP29 11-22 qarasha aralyǵynda Bakýde ótedi. Forýmnyń basty taqyryby — 2025 jyldan bastap klımattyń ózgerýine qarsy kúres sharalaryn qarjylandyrý. Sonymen qatar, konferentsııaǵa qatysýshylar atmosferaǵa parnıktik gazdar shyǵaryndylaryn azaıtý boıynsha aldaǵy jumystardy talqylaıdy. Qazaqstan Prezıdenti Qasym-Jomart Toqaev COP29 jahandyq klımat sammıtine qatysty.

Buǵan deıin Túrkııanyń Izraılmen saýda-ekonomıkalyq qarym-qatynastaryn toqtatý sharalarynyń ekinshi kezeńin júzege asyrýǵa kiriskenin jazǵan bolatynbyz. Osy jaǵdaıǵa baılanysty taýarlardyń barlyq toptary boıynsha eksporttyq-ımporttyq operatsııalar toqtatyldy.

Keıin Túrkııanyń Saýda mınıstrligi Izraıl tarapynyń keıbir málimdemelerine qaramastan, Izraılmen saýda-ekonomıkalyq qarym-qatynastar tolyǵymen jabylǵanyn habarlady.

Túrkııanyń Syrtqy ister mınıstrligi Birikken Ulttar Uıymyna hat joldaǵanyn málimdedi. Oǵan qol qoıǵan 52 memleket arasynda Qazaqstan da bar. Sonymen qatar halyqaralyq uıymdar — Arab memleketteri Lıgasy jáne Islam Yntymaqtastyǵy uıymy bar. Qujat basyp alynǵan Palestına terrıtorııalarynda, ásirese Gaza sektorynda halyqaralyq quqyq normalaryn buzýdyń aldyn alý úshin Izraılge qarsy qarý-jaraq embargosyn engizýge shaqyrady.