Túrkııa Grekııamen daýlardy beıbit jolmen sheshýge nıetti

NUR-SULTAN. QazAqparat - Túrkııa Ankara men Afıny arasyndaǵy kelispeýshilikterdi beıbit jolmen sheshýge tyrysady. Bul týraly Jerorta teńizindegi «Mavı Vatan-2022» áskerı jattyǵýlary qatysýshylaryna beınebaılanys arqyly sóılegen sózinde Túrkııanyń ulttyq qorǵanys mınıstri Hýlýsı Akar málimdedi. Bul týraly QazAqparat Anadoly aqparat agenttigine silteme jasap habarlaıdy.

«Túrkııanyń beıbitshilik jolynda árqashan bir qadam alda bolatynyna eshkim kúmán keltirmesin. Bizdiń maqsatymyz – Egeı teńiziniń búkil baılyǵyn ádil túrde bólisý. Egeı – dostyq teńizi. Túrkııa osyǵan umtylýda. Biz kórshimiz Grekııaǵa shyn júrekten dostyq qolyn sozamyz», - dedi mınıstr.

Onyń aıtýynsha, Ankara Afınymen qarym-qatynasynda halyqaralyq quqyqty qurmetteý men árqashan tatý kórshilik prıntsıpiniń ústemdigin jaqtaıdy.

Túrik áskerı vedomstvosynyń basshysy eki el arasyndaǵy dıalogty damytý mańyzdylyǵyna toqtaldy. Bul rette ol grek tarapyn osy baǵytta belsendi qadamdar jasaýǵa úndedi.