Túrkııa 9 memlekettiń elshisin SІM-ne shaqyrdy

ANKARA. QazAqparat – Túrkııa SІM-ne toǵyz memlekettiń elshileri Ystambuldaǵy bas konsýldyqtarynyń jabylýyna baılanysty shaqyryldy, dep habarlaıdy QazAqparattyń menshikti tilshisi.

Buǵan deıin Túrkııa ІІM Súleıman Soılý birqatar Batys elderi Ankaraǵa qarsy «psıhologııalyq soǵys» ashyp, eshqandaı dálel keltirmesten lańkestik qaýip syltaýymen dıplomatııalyq ókildikterin japqanyn málimdegen bolatyn.
«Ádildik jáne damý» basqarýshy partııasynyń (ÁDP) resmı ókili Omer Chelık batys elderi bas konsýldyqtarynyń jumysyn toqtatqan syltaý - «oıǵa qonymsyz», al buǵan qatysty málimdemeni «jaýapsyzdyq» dep atady.
3 aqpandaǵy jaǵdaı boıynsha, Frantsııa, Shveıtsarııa, GFR, Shvetsııa, Nıderlandy, AQSh, Italııa, Danııa men Ulybrıtanııa Ystambuldaǵy konsýldyqtaryn ýaqytsha japty.
30 qańtarda AQSh elshiligi azamattaryna Ystambul ortalyǵyndaǵy teraktilerdiń qaýipti ekenin eskertti. Olardyń pikirinshe, lańkesterdiń maqsaty shirkeý, sınagogalar, Ystambuldaǵy dıplomatııalyq mıssııalar jáne sheteldikter arasynda tanymal basqa oryndar, ásirese Ystambuldaǵy Beıoǵly, Galata, Taksım aýdandary men Istıklıal dańǵyly bolýy múmkin.
Stokgolmdegi túrik elshiligi aldynda Qurandy órteý saldarynan Túrkııa men Shvetsııa arasyndaǵy dıplomatııalyq janjal ýshyǵyp tur. Mundaı aktsııalar Eýropanyń basqa elderinde de boldy.
Buǵan deıin Túrkııa Shvetsııada ótken aktsııaǵa jaýap retinde Stokgolmniń Soltústik Atlantıkalyq kelisim uıymyna múshe bolý úshin jibergen ótinishin maquldamaıtynyn sheshkeni habarlanǵan.
Avtor: Aqjigit Chýkýbaev

Foto: apa.az