Túrkistandyqtar Ózbekstannyń qoqys polıgonyndaǵy tútinge eki jyl tunshyǵyp kelgen

KELES. QazAqparat – Túrkistan oblysynyń Keles aýdanynda Ózbekstannyń qoqys polıgonynan keletin tútinnen zardap shekken aýyldyń máselesi oń sheshimin tapty, dep habarlaıdy QazAqparat tilshisi.

Eki eldiń shekarasynda ornalasqan Alpamys batyr aýyly turǵyndarynyń problemasyn sheshýge «Nur Otan» partııasynyń Keles aýdandyq fılıaly aralasqan.

Partııanyń aýdandyq fılıalyna túsken hatta aýyl okrýginiń Ózbekstan Respýblıkasynyń qoqys polıgony tútep, halyqtyń dalada demalýdan qalǵany aıtylǵan bolatyn. Atalǵan másele boıynsha aýdandyq fılıal tóraǵasynyń birinshi orynbasary A.Jumabekov Ózbekstannyń Tashkent aýdany ákiminiń orynbasary R.Haıdarovpen habarlasyp, qoqys polıgonyndaǵy tútindi toqtatý máselesin kóterdi. Nátıjesinde úsh kún merzimde qoqys polıgonyndaǵy tútin toqtatylyp, kórshi aýylǵa taramaıtyn boldy. Ózbekstan tarapy aldaǵy ýaqytta da atalǵan keleńsizdikti joıý men onyń qaıtalanbaýy boıynsha partııanyń aýdandyq fılıalyna habarlap otyratynyn jetkizgen.

Aıta keteıik, Alpamys batyrlyqtar sońǵy eki jyl kóleminde osy máseleni aıtyp, elimizdiń Ekologııa mınıstri men oblys ákimi Ómirzaq Shókeevten kómek suraǵan bolatyn. Alaıda kórshi eldiń qoqys polıgonynan býdaqtaǵan tútin toqtamaǵan edi.