Túrkistandyqtar memlekettik marapatqa ıe boldy

TÚRKІSTAN. QazAqparat – Táýelsizdik kúni qarsańynda Túrkistan oblysynyń ákimi Ómirzaq Shókeev memlekettik jáne qoǵamdyq qyzmette sińirgen eńbegi men eldiń áleýmettik-ekonomıkalyq jáne mádenı damýyna úles qosyp júrgen azamattarǵa memlekettik marapatty saltanatty jaǵdaıda tabys etti. «Tuǵyrly bol, Táýelsizdik» is-sharasynda keýdesine orden-medal taǵylǵan jandardyń arasynda elimizge tanymal tulǵalar men qarapaıym eńbek adamdary da bar, dep habarlaıdy QazAqparat tilshisi.

Saltanatty sharada sóz alǵan aımaq basshysy Ómirzaq Shókeev barsha túrkistandyqtardy Táýelsizdik kúni merekesimen quttyqtady.

«Keshegi ata-babalarymyzdyń tókken teri men qan maıdanda aqqan qanynyń óteýi – búgingi Táýelsizdik. 29 jyl ishinde elimiz tolaǵaı tabystarǵa qol jetkizip, tolyqqandy damyǵan, básekege qabiletti, álem nazaryn aýdarǵan alpaýyt elge aınaldy. Koronavırýs pandemııasy ómir súrý mánin ózgertip, adamzat qundylyǵyn aıqyndaýǵa múmkindik berdi. Aıtyp kelmeıtin apattardan ońtústiktiń eńbekqor halqy aýyzbirshilik pen yntymaqtyń arqasynda abyroımen ótip keledi. Kúlli Túrki jurtynyń rýhanı astanasy – Túrkistan qalasy da kúnnen kúnge kórkeıip, kóne tarıhtyń syry men zamanaýı qalanyń syny astasqan, kórkine kóz toımaıtyn jaýhar qalaǵa aınalyp keledi. Táýelsizdik kúni – barshamyz úshin, kúlli Qazaqstandyqtar men álemniń barlyq qıyryndaǵy qandastarymyz úshin de Uly mereke! Osy asyl qazynamyzdy kóz qarashyǵyndaı saqtap, birligimizdi tý etip, elimizdiń barlyq baǵytta damyǵan memleketke aınalýy jolynda aıanbaı eńbek etýimiz kerek. Yntymaq, birligimiz ydyramaı, el ıgiligi jolyndaǵy árbir isimiz jemisti bolsyn!», - dedi oblys ákimi Ómirzaq Shókeev.

Táýelsizdik kúnine oraı 80-ge jýyq azamat, atap aıtqanda, bilim berý, densaýlyq saqtaý, óndiris pen bıznes salasynda qyzmet etip júrgen azamattar, áskerı qyzmetshiler, quqyq qorǵaý organdarynyń qyzmetkerleri, eńbek ardagerleri, mádenıet jáne ǵylym qaıratkerleri erekshe qurmetke ıe boldy. Ózbekstan Respýblıkasynyń tótenshe jaǵdaılar mınıstri Tursynhan Qudaıbergenov, YDA Group dırektorlar keńesiniń tóraǵasy Arslan Hýseın ІІ dárejeli «Dostyq» ordeniniń ıeleri atandy. Memlekettik marapatqa ıe bolǵan túrkistandyqtardyń qatarynda «Ardagerler uıymy» RQB Túrkistan oblystyq fılıaly tóraǵasynyń orynbasary Kenjehan Tólebaev – «Parasat» ordenimen, Túrkistan oblysy ákimi apparatynyń basshysy Áýelhan Turǵymbekov «Parasat» ordenimen, «Ardagerler uıymy» RQB Túrkistan qalalyq fılıalynyń tóraǵasy Jarqynbek Qulbaıymbetov «Qurmet» ordenimen, «Kentaý qalalyq emhanasy» MKK meıirbıkesi Beısenkúl Qudaıbergenova «Eren eńbegi úshin» medalimen, «Asqar taý» sharýa qojalyǵynyń shopany Asqar Kenehan «Eńbek Dańqy» ordenimen, «Shapaǵat» múgedekterdiń qaıyrymdylyq qorynyń prezıdenti Shaltan Erkinbaı «Shapaǵat» medalimen, «Abaı» Keles aýdandyq aýrýhanasy» MKK dárigeri Eldos Jaqsybaev «Shapaǵat» medalimen marapattaldy.