Túrkistandyqtar Qostanaıǵa kómek retinde 70 mln teńge jınady

TÚRKІSTAN. QazAqparat-Qostanaı oblysyndaǵy órtten japa shekken turǵyndarǵa túrkistandyqtar da kómektespek, dep habarlaıdy QazAqparat tilshisi.

Túrkistan oblysy ákimdiginiń memlekettik qyzmetshileri 1 kúndik jalaqylaryn aýdaryp, kásipkerler de qarjylaı kómek kórsetýde. Qazirgi tańda jalpy 70 mln. teńge qarjy Qostanaı oblysyna kómek retinde jınaldy.

Túrkistan oblysynda birneshe gýmanıtarlyq kómek qabyldaý pýnktterin jumys istep jatyr. Atap aıtar bolsaq, Túrkistan oblystyq «Jastar resýrstyq ortalyǵy» ǵımaraty men Túrkistan qalalyq «Amanat» partııasynyń janyndaǵy «Jastar ruhy» jastar qanatynyń kovorkıng ortalyǵy, «Qyzyl jarty aı» qoǵamdyq qory shtaby, Shymkent qalasyndaǵy oblystyq ákimdiktiń burynǵy ǵımaratynda qostanaılyqtarǵa beriletin kómek zattary jınalýda.

Qazaqstan Halqy Assambleıasynyń aýdan-qaladaǵy fılıaldary da kómek kórsetýde belsendilik tanytýda.

Sondaı-aq 17 aýdan, qalalyq «Jastar resýrstyq ortalyqtary» ǵımarattarynda gýmanıtarlyq kómek jınalyp jatyr. Olardyń ishinde halyqqa asa qajetti tósek jabdyqtary, sanıtarlyq zattar, uzaq ýaqytqa jaramdy konservilengen jáne jartylaı fabrıkattalǵan azyq-túlik bar.

4 qyrkúıek kúngi málimet boıynsha 1 Kamaz gýmanıtarlyq kómek Qostanaıǵa jóneltilgen.

Al erteń, taǵy da gýmanıtarlyq kómek tıegen 20 tonnalyq 2-3 júk kóligi jolǵa shyǵady.