Túrkistandyq jastar til janashyrlarymen kezdesti
Túrkistan oblystyq Qoǵamdyq damý basqarmasynyń uıymdastyrýmen Jastar resýrstyq ortalyǵynda «Ahyska» túrik etno-mádenı ortalyǵy« qoǵamdyq birlestiginiń múshesi Ásker Pırıev, CTS kompanııasynyń baspasóz hatshysy Oksana Loskýtova, «Lingva TEN« til ortalyǵynyń jetekshisi, dáriger-polıglot Vladıslav Ten túrkistandyq órendermen arnaıy kezdesti.
Erkin formattaǵy bul sharaǵa qala aýmaǵyndaǵy belsendi jastar men jastar ortalyǵynyń mamandary qatysty. Úshtildilik saıasattyń ozyq maqsattaryn alǵa tartqan qonaqtar búgingi býynǵa aǵylshyn tilin úırenýdiń qyr-syryn túsindirdi. Sheberlik sabaǵy barysynda jas býyn ókilderi shet tilin meńgerý aldymen ózimiz úshin, sosyn elimiz úshin paıdasy mol degen túsinikte ekenderin jetkizdi.
«Ózge tildiń bárin bil, óz tilińdi qurmette» degen ustanymda ótken jıyn barysynda jastar qonaqtardan kókeıde júrgen suraqtaryna jaýap ala aldy. Ulty orys bolsa da, qazaq tilin jetik meńgergen til mamany Oksana Loskýtova: «Qazaq tiliniń tarıhy men sózdik qory óte baı. Syrttan qaraǵanda qıyn til bolyp kóringenimen, úırenýge jeńil, sóılesýge jaǵymdy til» ,- dep óz oıyn jetkizdi.
«Aǵylshyn tili - búgingi kúnniń basty talaby. Sondyqtan ony bilý arqyly bolashaǵymyzǵa dańǵyl jol ashamyz. Álemniń kez-kelgen eline baryp, aǵylshyn tili arqyly tildesip kete berýge bolady. Jańa oblys ortalyǵynyń bolashaǵy men keleshegi senderdiń qoldaryńda, sol úshin eń aldymen kóp til bilýge umtylyńdar»,- dep Ásker Pırıev Túrkistan oblysynyń jastarymen óziniń ómirlik tájirıbesimen bólisti.
Basqosýdyń sońy jastardyń kóńildi otyrysymen aıaqtaldy. Gıtaramen án salyp, Abaıdyń ánderin shyrqady. Túrkistan oblysynyń belsendi jastary til janashyrlarymen ótken kezdesýden soń, úlken motıvatsııa alyp tarqasty.
