Túrkistandyq volonterler aýdandyq aýrýhanaǵa kómektesti

TÚLKІBAS. QazAqparat – Túrkistan oblysynyń Túlkibas aýdanynda jurtty ábigerge salǵan koronavırýs indetimen kúreste jomart jandar barynsha atsalysýda. Aýdannyń erikti turǵyndary ortalyq aýrýhanaǵa qazirgi tańda tazalyq úshin asa qajetti avtomattandyrylǵan 5 kir jýý mashınasyn tartý etti, dep habarlaıdy QazAqparat tilshisi.

Sondaı-aq, eldi mekenderde keń júrekti azamattar muqtaj otbasylarǵa qoldan kelgen kómekterin aıamaýda. Sońǵy eki kúnde aýdanǵa qarasty Abaıyl men Jaskeshý aýylynyń turǵyndary qarjy jınap, 30 januıaǵa qurbandyqqa shalynǵan 2 iri qara men 2 qoıdyń etin bólip berdi. Turmysy tómen otbasylarǵa etpen qosa, birinshi qajettiliktegi azyq-túlik berildi.

Aıta keteıik, buǵan deıin túlkibastyq demeýshiler men eriktiler ortalyq aýrýhanaǵa 210 ottegi balonyn tartý etken bolatyn. Al, aýdan ákimdigi volonterlerge aýrýhananyń ballondaryn ottegimen toltyryp kelý úshin Gazel avtokóligin bólgen bolatyn. Sonymen qatar, barlyq aýyldyq okrýg, kent ákimderi ózderiniń qyzmettik kólikteri men júrgizýshilerin aq halatty abzal jandarǵa berip, búginde 17 kólikpen dárigerlerdi naýqastarǵa tasymaldaýda.