Túrkistandyq oqýshy qymyz quıatyn robot oılap tapty

TÚRKІSTAN. QazAqparat - Tólebı aýdanyndaǵy Sh.Ýálıhanov atyndaǵy №2 jalpy orta mekteptiń 9-synyp oqýshysy Jansultan Tórebek ınformatıka pániniń muǵalimi Laýra Jaqsybekovanyń kómegimen «Asylbek» esimdi qymyz quıatyn robot jasap shyqty, dep habarlaıdy QazAqparat.

Otyrar.kz saıtynyń jazýynsha, kez kelgen adam bul robotqa arnaıy plastıkalyq kartany jaqyndatý arqyly Asylbekti sóılete bastaıdy. Sodan keıin robot qymyzdyń shıpaly qasıeti týraly qysqasha maǵlumat beredi ári ydysqa paıdaly sýsyn quıady.

«Robottardyń túrlerine, jumys isteý prıntsıpterine qyzyǵýshylyǵym burynnan bar bolatyn. Mundaı robot qurastyrý ıdeıasy mektebimizde ótken ınformatıka páni aptalyǵynda uıymdastyrylǵan robottar kórmesi kezinde týdy. «Asylbek» robotyn jasaý týraly oıymmen aldymen muǵalimim Laýra apaımen bólistim. Ol ıdeıamdy qoldap, qurastyrýda kómektesetinin aıtty. Meniń robotym oqýshylardyń robototehnıkaǵa degen qyzyǵýshylyǵyn arttyrýmen qatar, emdik qasıetke ıe sýsyn arqyly jastardyń arasynda salaýatty ómir saltyn dáripteıdi. Ulttyq sýsynymyzdy nasıhattaıtyn bolǵandyqtan, «Asylbektiń» ulttyq kıimde bolǵany durys dep sheshtik», – deıdi Jansultan.

Onyń qymyz quıatyn robot jobasy ǵylymı jobalar baıqaýynyń aýdandyq jáne oblystyq kezeńderinde júldeli boldy.

Foto: kz.otyrar.kz