Túrkistandyq oqýshy AQSh-taǵy 8 ýnıversıtettiń grantyn jeńip aldy
Janerke Zeılbekova Keles aýdany Birtilek aýyldyq okrýginde ornalasqan №9 Kóltoǵan jalpy orta mektebinde oqıdy. 9-synyptan bastap aǵylshyn tilin meńgerýge den qoıǵan. Semınarlar men kýrstarǵa qatysyp, bilimin jetildirýmen keledi. Basty maqsaty - Nazarbaev ýnıversıtetine túsý bolatyn.
Ol byltyr sheteldik ýnıversıtetter jarııalaǵan onlaın olımpıadalar men konkýrstarǵa qatysyp, baǵyn synap kóredi. Sonyń nátıjesinde AQSh-taǵy 8 ýnıversıtetten oqýǵa shaqyrtý alyp otyr.
«Janerke - óte zerek oqýshy. Qashyqtyqtan oqý formatyna aýysqan kezde ýaqytyn bosqa ótkizbeı, aǵylshyn tili boıynsha sabaqtarǵa qatysyp júrdi. Repetıtor jaldap, onlaın dáris aldy. Minezi salmaqty, qarapaıym ǵana aýyldyń qyzy. Eshqandaı gımnazııa, lıtseı emes, jáı synypta oqıdy. Bostan, Nıý-Iork, Chıkago qalalarynda ornalasqan joǵary oqý oryndarynan shaqyrtý kelipti. Biz aýyl bolyp qatty qýanyp jatyrmyz», - deıdi mektep dırektory Qaldygúl Tursynbekova.
Qazir Janerke aldaǵy emtıhandar men synaqtarǵa daıyndalyp jatyr. Qujattaryn Túrkııa ýnıversıtetteriniń birine de ótkizip qoıǵan. Bilimdi shákirt jetistikke jetýine sebepshi bolǵan ustazdaryna dán rıza. Al ózi keleshekte dáriger bolýǵa talpynyp otyr.
