Túrkistandyq muǵalimder arasynda qylmystyq jaýapkershilikke tartylǵandar bar

TÚRKІSTAN. QazAqparat - Túrkistan oblysynyń mektepterinde qylmystyq jaýapkershilikke tartylǵan muǵalimder sabaq berip kelgen. Bul týraly oblystyq qoǵamdyq keńes otyrysynda Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti preventsııa basqarmasy basshysynyń orynbasary Sábıt Ásilbek aıtty, dep habarlaıdy QazAqparat tilshisi.

«Taldaý barysynda Arys qalasy men Shardara, Saýran aýdandarynda jumys isteıtin muǵalimderde sottylyqtyń bolýy nemese bolmaýy zertteldi. Nátıjesinde atalǵan aýdandarda 8 443 muǵalimniń 90-y qylmystyq jaýapkershilikke tartylǵany anyqtaldy. Shardara aýdanynda – 43, Saýran aýdanynda – 32, Arys aýdanynda 15 fakt tirkelgen. Onyń ishinde esirtki nemese psıhotroptyq zattardy zańsyz daıyndaý, óńdeý, satyp alý, saqtaý, tasymaldaý, jóneltý nemese ótkizý jáne urlyq, para berý/alý, qaraqshylyq jáne taǵy basqa da qylmys túrlerin jasaǵandar bar» - dedi Sábıt Ásilbek.