Túrkistandyq áıel 24 jyl boıy tólqujatsyz júrgen

TÚRKІSTAN. QazAqparat – Túrkistan oblysyndaǵy Sozaq aýdandyq polıtsııa bóliminiń kóshi-qon qyzmetine orta jastaǵy azamatsha jeke basyn qujattandyrýǵa ótinish bildirgen, dep habarlaıdy QazAqparat.

Vedomstvonyń málimetinshe, ol 1998 jyly otbasylyq jaǵdaıyna baılanysty Ózbekstan Respýblıkasynan Qazaqstanǵa kóship kelgen. Sodan beri 24 jyl boıyna qujatsyz júrgen.

«Ótinishti alysymen kóshi-qon polıtseıleri birden tirkep, shuǵyl túrde Shahnoza Madamınovanyń qujattaryn rásimdedi. Nátıjesinde tártip saqshylary áıeldiń jeke basyn anyqtaıtyn tólqujatyn zańǵa sáıkes jasap berdi», - dep jazdy aımaqtaǵy polıtsııa basqarmasynyń baspasóz qyzmeti.