Túrkistandyq 13 oqýshy «Elbasy medalimen» marapattaldy

TÚRKІSTAN. QazAqparat - Túrkistan qalasynyń 13 oqýshysy «Elbasy medalimen» marapattaldy. Atalǵan jobaǵa 11 myńnan astam qatysýshy men 600 tálimger, 17 óńirlik úılestirýshi men sarapshy qatysqan bolatyn, dep habarlaıdy QazAqparat tilshisi.

Joba aıasynda qatysýshylar sporttaǵy daıyndyǵyn jetildiráp, ulttyq murany zerttegen. Álemdik jáne qazaq ádebıetiniń shyǵarmalarymen tanysyp, eńbek praktıkasynan ótken.

Sondaı-aq, eldiń ár túkpirine baryp, Qazaqstan tarıhyna úńildi jáne volonterlik qyzmette de belsendilik tanytqan. Jarty jyl kóleminde ózderiniń tabandylyǵyn tanytyp, shyǵarmashylyǵyn shyńdaǵan. Jan-jaqty izdengen jeńimpaz shákirtter nátıjesin kórsetip, oq boıy oza shapty.

Olardyń qatarynda Nekrasov atyndaǵy №9, Atatúrik atyndaǵy №17, M.Jumabaev atyndaǵy №15 mektep-gımnazııalarynyń, J.Táshenov atyndaǵy №23 ІT mektep-lıtseıiniń, J.Jabaev atyndaǵy №11, B.Momyshuly atyndaǵy №22, N.Tórequlov atyndaǵy №8 jáne Á.Naýaı atyndaǵy №13 jalpy orta mektepteriniń oqýshylary bar. Qala ákimi Rashıd Aıýpov Nursultan Nazarbaev qorynyń qoldaýymen «Elbasy Akademııasy» korporatıvtik qory iske asyrǵan «El úmiti» jobasynyń jeńimpazdaryn medal, tósbelgi jáne alǵys hatpen marapattady.

Aıta keteıik, aıtýly joba ótken jyldyń shilde aıynda damý baǵdarlamasyn kózdegen 7 baǵyt boıynsha bastaý alǵan edi. Olar sport, daryn men daǵdy, kitap oqý, ulttyq mura, eriktilik, saıahat pen joryqtar, eńbek tájirıbesi. Qatysýshylar úsh deńgeıdi tańdap, ár baǵyt boıynsha belgili bir qyzmetti oryndaýdy kózdedi.