Túrkistanda «Tartyl fest» týrnıkke tartylý festıvali ótedi

TÚRKІSTAN. QazAqparat - Túrkistanda qalasynda 25 shilde kúni saǵat 21:00-de «Tartyl fest» týrnıkke tartylý festıvali bastalady. Sharany «Dara» daryndylardy qoldaý qory uıymdastyryp otyr, dep habarlaıdy QazAqparat tilshisi.

Buqaralyq sportty damytý jáne jastardy salaýatty ómirge baýlý maqsatynda uıymdastyrylyp otyrǵan festıval Amfıteatr ortalyǵynda ótedi. Qazirgi kezge deıin 400-ge jýyq turǵyn qatysýǵa ótinim bergen.

Sondaı-aq, festıval aıasynda túrkistandyqtar estrada juldyzy Mıras Júginisovtyń kontsertin tamashalaıdy.

Aıta keteıik, buǵan deıin «Tartyl Fest» týrnıkte tartylý boıynsha respýblıkalyq sport festıvali Qonaev qalasynda bastalǵan bolatyn. Sondaı-aq, Taldyqorǵan, Almaty, Taraz, Shymkent qalalarynda jalǵasyn tapty. Keshe, Shymkenttik turǵyn Azamat Sapar týrnıkte 41 ret tartylyp, rekordttyq kórsetkishti jańartty. 10 shilde - 6 qyrkúıek aralyǵynda ótetin shara elimizdiń 20 qalasynda uıymdastyrylyp, ár qaladan 27 jeńimpaz anyqtalýda. Olar Nur-sultan qalasynda ótetin grand-fınalǵa qatysady dep kútilýde. Grand-fınaldyń júlde qory-54 mln teńge. Al, Grand-fınal chempıondary Street Workout boıynsha álem chempıonatyna qatysa alady.