Túrkistanda saılaý zańdylyǵy týraly semınar ótti

TÚRKІSTAN. QazAqparat - Túrkistanda oblys ákiminiń orynbasary Málik Otarbaevtyń tóraǵalyǵymen, Qazaqstan Respýblıkasy Prezıdentin saılaý boıynsha BAQ betterinde saılaýdy aqparattandyrýda zańdylyqty saqtaý jóninde semınar ótti. Semınardy oblystyq ishki saıasat basqarmasy uıymdastyrdy, dep habarlaıdy QazAqparat.

Semınar maqsaty - BAQ ókilderiniń saılaý zańdylyqtaryn turǵyndar arasynda keńinen nasıhattaý.

Osy oraıda, atalǵan semınarǵa oblystyq saılaý komıssııasy tóraǵasynyń orynbasary jáne BAQ ókilderi qatysty.

Aldymen sóz alǵan oblystyq saılaý komıssııasy tóraǵasynyń orynbasary Ámirdın Álishev OSK tarapynan júrgizilip jatqan jumystarǵa toqtaldy.

Sondaı-aq, semınarda Túrkistan oblystyq ishki saıasat basqarmasynyń basshysy Beısenbaı Tájibaev BAQ-da saılaýdy aqparattandyrý jónindegi zańdylyqty saqtaý boıynsha baıandama jasap, jýrnalıster qaýymyna saılaý naýqanynda BAQ ókilderiniń resmı tirkelý máselesin atap ótti.

«Elimizdegi mańyzdy qoǵamdyq-saıası protsesti BAQ muqııat qarap, belsendi túrde aqparat taratqany durys. Bul turǵydan birqatar redaktsııalardyń belsendiligi ortasha deńgeıde qalyp otyr. Sondaı-aq qoǵam suranysyna oraı jańa medıa talabymen jumys júrgizý kerek. Aýdandyq jáne oblystyq BAQ ókilderi saılaýǵa deıin 7 jumys kúni buryn jeke kýáligin jáne jumys jasaıtyn redaktsııasynyń saılaýǵa qatysty baǵyttamasyn alyp, ózderine tıisti saılaý komıssııasyna baryp akkredıtatsııadan ótýi tıis. Arnaıy tirkeýden ótken tilshiler saılaý kúni ýchaskelerden aqparat tarata alady», - dedi B. Tájibaev

Kelesi kezekte sóz alǵan aqparattyq-taldaý ortalyǵynyń dırektory Seıdýlla Aıkózov saılaý taqyryby jóninde BAQ-na sholý jasady.

Jýrnalıster qaýymy jáne ákimdik ókilderiniń erkin formatta ózara pikir almasýynan soń QR Jýrnalıster Odaǵynyń Túrkistan oblystyq fılıalynyń tóraǵasy Ǵalymjan Elshibaı 28 maýsym - baılanys jáne aqparat qyzmetkerleri kúnine oraı ótkiziletin spartakıada týraly habarlama jasady. Bıyl jarysty 10 sport túri boıynsha oblys jáne Shymkent qalasynyń jýrnalısteri birlese ótkizýge kelisti. Spartakıadanyń ashylýy 14 maýsym kúni Túrkistanda bastalyp, 22 maýsym kúni Shymkentte qorytyndylanatyn bolady.

Jıyn sońynda oblys ákiminiń orynbasary M. Otarbaev elimizde maýsym aıynda ótetin QR Prezıdenttigine saılaýǵa jergilikti turǵyndardyń barynsha qatysýyn qamtamasyz etý jáne BAQ-da zańdylyqtardy qatań saqtaýǵa barshany belsene qatysýǵa shaqyrdy.