Túrkistanda rezıdentýraǵa túsýshi úmitkerlerge ekinshi múmkindik berildi
Qoja Ahmet ıAsaýı atyndaǵy Halyqaralyq qazaq-túrik ýnıversıtetiniń rezıdentýraǵa túsýshi úmitkerleri ótkizilgen emtıhanǵa qatysty narazylyq bildirip, áleýmettik jelige vıdeo jarııalady. Onda úmitkerler emtıhan suraqtary kúrdeli jáne olar rezıdentýraǵa túsýshiler deńgeıine sáıkes kelmeıtindigin aıtqan. Sondaı-aq, Ǵylym jáne joǵary bilim mınıstrinen máseleni sheship berýdi suraǵan.
Atalǵan jaǵdaı boıynsha Qoja Ahmet ıAsaýı atyndaǵy Halyqaralyq qazaq-túrik ýnıversıtetine habarlasyp, mán-jaıdy surap bildik.
«Aryzdanýshy úmitkerlerdiń «emtıhan suraqtary kúrdeli jáne olar rezıdentýraǵa túsýshiler deńgeıine sáıkes emes» degen pikiriniń eshqandaı negizi joq. Óıtkeni, barlyq suraqtar qorytyndy memlekettik attestatsııa (QMA) testterin ázirleý úshin bekitilgen jalpy dárigerlik tájirıbe spetsıfıkatsııasynyń talaptaryna tolyq sáıkes keledi. Test suraqtaryn bilikti sarapshylar jınaqtady. Sońǵy úsh jylda qabyldaý emtıhandarynyń suraqtary tómendegi qaǵıdat boıynsha ázirlenip keledi. 70% - jalpy dárigerlik praktıka boıynsha jáne 30% - tańdalǵan rezıdentýra baǵdarlamasynyń baǵyty boıynsha. Úmitkerlerge fakýltet tarapynan joǵarydaǵy qaǵıdat týraly kimniń durys emes málimet bergeni anyqtalyp, jaýapkershilikke tartylatyn bolady» - delingen ýnıversıtettiń baspasóz qyzmeti usynǵan aqparatta.
Sondaı-aq, oqý orny tarapynan aıtylǵan jaýapta qabyldaý emtıhandary tolyǵymen belgilengen talaptarǵa saı uıymdastyrylǵany kórsetilgen. Emtıhan ótkizý tártibi de qatań baqylaýda bolǵan.
«Saıttaǵy jarııalanǵan baǵdarlamalyq suraqtar jalpy úmitkerlerdiń nazarǵa alyp daıyndalýy úshin belgilengen, ol – test suraqtary emes. Test suraqtary aldyn ala eshkimge taratylmaıdy jáne ýnıversıtet óz tarapynan aqparattyq qaýipsizdikti qamtamasyz etý úshin kerekti sharalardy uıymdastyrady» - dep kórsetilgen.
Al, jańa platformaǵa kóshý barysynda tehnıkalyq qatelik oryn alyp, ýaqyttyń qysqarýyna baılanysty ýnıversıtet basshylyǵy úmitkerlerge ekinshi múmkindik berýge sheshim qabyldap otyr. Emtıhan nátıjesi boıynsha úmitkerler eki múmkindiktiń eń joǵarǵy upaıyn esepke usyna alady.
«Rezıdentýraǵa túsýshi úmitkerlerdiń emtıhan ýaqytynyń jetkiliksiz bolǵany týraly shaǵymyn qarastyrǵan kezde, ýnıversıtettiń ÝE-HQTÝ-088-2022 «Joǵary bilimnen keıingi bilim berý baǵdarlamalary boıynsha magıstratýra, rezıdentýra, doktorantýraǵa oqýǵa qabyldaý» erejesiniń 7.10 tarmaǵy saqtalmaǵany anyqtaldy. Erejege sáıkes emtıhan ýaqyty 150 mınýt bolyp bekitilgen, alaıda jańa platformaǵa kóshý barysynda tehnıkalyq qate oryn alyp, is júzinde emtıhan 120 mınýt bolǵan. Ýnıversıtet basshylyǵy oryn alǵan tehnıkalyq qate úshin barlyq úmitkerlerden keshirim suraı otyryp, ekinshi múmkindik berýge sheshim qabyldady. Emtıhan nátıjesi boıynsha eki múmkindiktiń eń joǵarǵysy esepke alynyp, konkýrsqa jiberiledi. Bul múmkindikti qoldaný úmitkerlerdiń óz erkinde» - delingen aqparatta.
