Túrkistanda halyqaralyq ınvestıtsııalyq forým ótedi

ShYMKENT. QazAqparat - Túrkistan qalasynda «Kóne Túrkistan - jańa múmkindikter» atty halyqaralyq ınvestıtsııalyq jəne týrıstik forým ótedi. Bul týraly oblys ákimdiginiń baspasóz qyzmeti málim etti, dep habarlaıdy QazAqparat tilshisi.

28-shi qyrkúıek kúni ótetin forýmǵa QR Investıtsııalar jáne damý mınıstri Jeńis Qasymbek pen QR Mádenıet jáne sport mınıstri Arystanbek Muhamedıuly, Túrki keńesiniń Bas hatshysy Baǵdat Ámireev pen Eýrazııalyq ekonomıkalyq yntymaqtastyq uıymynyń Bas hatshysy Vladımr Pıskýrev, «RIXOS HOTELS» prezıdenti Fetah Tamındjı men «DALHolding» kompanııasynyń basshysy Demırdjan Kose  qatysady.

Sondaı-aq, «Golden Camel» kompanııasynyń quryltaıshysy ıAng Tsıe men Týrızmniń Eýrazııalyq Assotsıatsııasynyń prezıdenti Rysty Qarabaeva, Eýrazııalyq ekonomıkalyq yntymaqtastyq uıymy Bas hatshysynyń orynbasary Gabrıel Kotchofa men Tájikstan Respýblıkasynyń saýda jáne ekonomıkalyq damý mınıstri - ulttyq úılestirýshisi Nematýllo Hıkmatýllozoda, Ózbekstan Respýblıkasynyń ınvestıtsııalar memlekettik komıteti tóraǵasynyń orynbasary men OAAEY ulttyq úılestirýshisi Vafaev Shýhrat, Pákistan strategııalyq zertteý ınstıtýtynyń dırektory Halıd Mahmýd pen «Rocket Media communications» negizin qalaýshy Maıkl Grabner sekildi spıkerler shaqyrylyp otyr.

Sonymen qatar, Eýropa elderi, Túrkııa, Reseı, Ońtústik Koreıa, Qytaı, Sıngapýr, Malaızııa, Pákistan, Ózbekstan t.b. memleketterden 250-den astam delegattar keledi dep josparlanǵan.