Túrkistan oblysynyń turǵyny úıiniń aýlasynan zoobaq ashyp aldy
Kentaý qalasyna qarasty Qarnaq aýylynyń turǵyny Raıymjan Qoshqarov úıinde erekshe ań-qustar men eshkilerdi asyrap otyr. Onda janýarlardyń 30-dan astam túri bar. Sondaı-aq, shaǵyn ǵana aýladan túlki, qoıan, túıequs, taýys, búrkit, qaz-úırek, taýyqtyń san túrin kezdestire alasyz.
«Qazir zoobaǵymyzdy tolyqtyryp, frantsııalyq, anglııalyq, gollandyq eshkilerdi aldyrtyp jatyrmyz. Olar kúnine 5-6 lıtrge deıin sút beredi. Bir ereksheligi – zoobaq barlyq kelýshilerge tegin. Búginde tek aýyl turǵyndary ǵana kelip jatyr. Aldaǵy ýaqytta janýarlar qataryn kóbeıtip, zoobaqtyń resmı ashylý saltanatyn jasaýdy josparlap otyrmyz», – deıdi ol.
Raıymjan Sattaruly oblystyq aqsaqaldar alqasynyń múshesi. Ózi Túrkistan qalasynda ornalasqan Atatúrik atyndaǵy mektepte sabaq beredi. Qoǵamdyq isterge de qulshyna kirisip, jastar tárbıesi, salaýatty ómir salty, urpaqtar sabaqtastyǵy baǵytynda aýqymdy ister atqaryp júr.
«Aýlamyzda qyryqqa jýyq qustyń túri bar. Sonymen qatar qoıan men túlkiniń erekshe túrleri de qamqorlyqqa alyndy. Jalpy, bul isti qolǵa alýyma oqýshylardyń usynysy túrtki boldy. Sabaq barysynda ań, qus jaıynda surasań, eshqandaı málimet bere almaıdy. Sol sebepti jastardy osynda alyp kelip, ań-qusty kózben kórsin degen maqsatta jasap jatyrmyn», – deıdi ol. Mundaǵy qoıandar men qarsaq keıde qashyp ketedi eken. Sondaı sátte ıesi búkil aýyldy izdep sharq urady. Al, tappasa tabıǵatqa tapsyrady. Qora-qopsydan qashqan qustar men qoıandar aýyl mańyndaǵy toǵaıdy panalaıdy.
«Balalardyń tanymdyq qabiletterin damytýǵa zoobaqtyń kómegi zor. Bul isti karantın kezinde bastadyq. Jan-janýardyń túrin kóbeıtýge pandemııa kedergi bolǵanymen, qurylys jumystaryn toqtaýsyz júrgizdik. Qazir zoobaqty tamashalaýǵa kelgen qonaqtar men turǵyndarǵa tamaqtanatyn oryn daıyndap jatyrmyz» – deıdi ustaz.
Raıymjannyń úı aýlasynan zoobaq ashyp jatqanyn estigen jerlesteri alǵashqy da tańdanyspen qaraǵan. Degenmen birte-birte úırenisip ketken. Qazir qonaqtaryn ertip, zoobaqty tamashalaýǵa jerlesteri jıi keledi. Jalpy, Raıymjan Qoshqarov sırek kezdesetin qustardy satyp alady. Tipti keıbirin shet elderden aldyrǵan. Al olardy kútip-baptaý úshin arnaıy daıyndalǵan qospalardy paıdalanady. Kúndelikti aıaq-qolyn spırtpen súrtip, tazartyp otyrady. Qaýipsizdik sharalaryn da qatań saqtaıdy.
